張文慈嘆香港做演員搵食難 50歲唔想為結婚而嫁人

2022-07-04 17:00

1996年參加亞姐入行的張文慈，近日接受內地傳媒訪問談近況，已經移居內地一年多的她，由演員轉做直播帶貨，她坦言起初非常不習慣，但仍然願意學習，皆因要靠做演員搵食並不容易，「我呢個年紀仲有嘢做都好感恩，我覺得香港做演員，除非你係好紅，如果唔係，生活其實唔容易。」

亞姐出身的張文慈，近年甚少拍戲，大多於內地工作。

張文慈仍然熱愛做演員。

張文慈入行就為亞洲電視效力，是該台的當家花旦，雖然大多都是做配角，但亦曾拍出代表作，如：《我和殭屍有個約會》系列、《情陷夜中環》系列及《縱橫四海》等。張文慈表示仍然熱愛做演員，但她因為要搵食養家，無奈暫棄自己最愛的演員崗位，受訪時更一度落淚，「我係真心想演戲，因為我係一個演員，我相信而家經歷咗咁多之後，如果將呢啲人生經歷放喺演戲上，我啲戲會更加有『戲味』。」張文慈稱入行26年，最令她迷茫的時期，是亞洲電視臨倒閉前，「嗰陣亞視已經開始冇嘢拍，年紀又唔細，又冇結婚，三十幾歲人……好似冇路行嘅感覺，又有壓力要養家，好似人生好絕望，於是開始放低身段。」

張文慈（左）拍《我和殭屍有個約會》系列劇集都好經典。

張文慈（左三）仍不時與亞視舊同事聚會。

說到人生大事，現年50歲的她似乎被問得煩厭，「我50歲又點啫，我冇結婚又點喎？有時候我覺得每個人價值觀唔同，如果你要我隨便搵個人結婚，講真我要結婚其實好易，我唔會為結婚而結婚。」她近年都專注在內地發展，去年索性搬埋返內地住，把自己當成新人重新開始。又大讚內地好先進，亦愈來愈習慣內地的生活，亦表示很自豪自己的祖國是中國，認為香港人真的要感恩。