張敬軒送名錶獲Jay回禮送「啷啷」尾場Show歌迷齊撐上紅館

2022-07-06 12:00

馮允謙（Jay）的處男騷《Have a JAY Time 2022演唱會》，昨晚（5日）在九展StarHall畫上句號，尾場捧場客包括柳應廷（Jer）、王灝兒（JW）、許廷鏗、C AllStar的陳健安與釗峰以及樂隊Nowhere Boy。當Jay唱到《不羈的風》時咪高峰一度無聲，但他依然處變不驚，更笑言證明他沒有「咪嘴」。而在「安歌」環節時Jay一度感觸落淚，全場舉起「下次紅館見」應援，Jay感觸說著粉絲要等他，最後5度安歌才完場。

Jay在尾場瞓身演出。

Jer昨晚單拖去睇騷。

JW和許廷鏗台下睇騷。

張敬軒驚喜現身為Jay擔任尾場嘉賓，合唱《愛斯基摩人之吻》，Jay稱未想過可請到他做嘉賓，軒仔笑言在演唱會收到其親手畫的門票，笑言進場時被拒可能是戴了口罩。軒仔指二人相識超過10年，更有一段短時間是同門，又指創作《Do What You Want》時想起Jay，獲對方一口答應合作，又sweet又有heart。軒仔又說：「唔知幾時開演唱會要送禮物啦！見他咁暴露應該補吓身，諗過送食物但我都無得食！諗唔到送乜，於是我打開夾萬，將08年紅館演唱會送俾自己嘅珍貴禮物，當時覺得自己冇好好把握，於是用歌酬買咗隻錶。」軒仔說畢即席除錶，坦言初入行時收入緊絀，第一次買名錶送自己，隨後軒仔親手將「人生最長時間的最貴名錶」為Jay戴上，並寄語他把握時間「紅館見」，十分感人。而Jay表示要回禮，軒仔表示以利是回禮便可以，Jay不明所以被取笑是「廣東話黑洞」，而Jay送上「啷啷禮物」給軒仔，被他反問：「依家我冇啷啷咩？」其後軒仔再唱《追風箏的孩子》，並留下來欣賞到安歌才離開。

軒仔驚喜亮相呀。

軒仔表示在夾萬攞出名錶送給Jay。

當年兩人曾屬同一間唱片公司。

全場支持上紅館。

完騷後Jay受訪，講到軒仔做嘉賓兼送名錶，他坦言從未想過原來公司邀請了軒仔，又笑言咁大個人從未收過名錶，十分驚訝原來軒仔如此痛錫自己，不知道如何報答，更即時戴起名錶展示一番，笑言可能放進夾萬未必會戴。提到戴上紅館是好機會？他稱上紅館一定戴，公司有計劃入紙紅館，希望很快有結果。提到Jay「盡得軒仔真傳」、5度安歌，Jay大讚歌迷十分sweet，因此忍不住出來安歌。

講到表現時咪高峰失靈，Jay坦言未試過，最緊要識「執生」。對到紅館開騷是否信心大增？Jay指今次等了10年，十分珍惜機會。提到尾聲痛哭，Jay稱：「真係控制唔到，諗起嫲嫲，當年返香港實現夢想，同年佢入咗老人院，覺得對佢唔住，做咗好多年成績又唔好，好內疚。」講到女友未有現身支持，Jay表示不敢遷怒女友，反而會嬲孖生弟弟因去旅行而未支持。