獨家丨導演馮志強率先劇透電影版內容　《I SWIM》劇集冇結局原班人馬戲院見

2022-07-11 07:00

曾拍攝電影《大樂師·為愛配樂》的導演馮志強為ViuTV執導10集青春劇《I SWIM》，據知拍攝電視版只為電影版舖路，馮導向《星島頭條》透露故事將由電視延伸到電影，大結局要到電影版才交待。導演講明會盡快開拍電影版，當然由原班人馬參與演出，唔怕劇透的馮導還首度公開電影版內容。採訪：杜杜攝影：沈健程　場地：The AIR (The ONE)

故事以馮導經歷為藍本，他中二至中七都是學校泳隊成員，亦有去海灘做過救生員。

馮導拍攝每場游水戲，都會親身陪團隊一齊落水。

馮導未入行已想拍《I SWIM》，年前寫成小說在網上連載，之後終遇上跟ViuTV合作機會，將故事改編成劇本，因小說版早已公開不怕劇透外，他還有另一睇法，「我係製造緊一個遊樂場，大家都知道摩天輪同過山車係點，但坐完都會再坐，我希望呢套戲可以帶到呢個力量畀觀眾，即使知道晒過程，仍然好希望同呢班人一齊衝一齊闖，隔5年依然會攞出嚟睇，呢個係我嘅理想。」

劇集版《I SWIM》，故事背景主要圍繞 A班同C班在游泳比賽的較量。

由於借場拍游水戲有一定難度，馮導坦言要苦了演員冬天捱住凍落水拍。

開頭只諗住拍5集

劇集只有10集，以港劇來講相當短，因馮導最初只想拍電影，他坦承跟ViuTV洽談時，整個計劃是由電視劇拍到電影，「10集對我嚟講好長，好似拍咗5部電影，我初初諗住拍5集算，或者淨係拍電影𠻹！本身個劇本係咁樣安排，結局喺個電影度。」馮導希望盡快開拍電影版，而且會盡量安排原班人馬演出，「演員年紀會大，當然電影版係講大學嘅故事。」

馮導為劇集還製作了全紀錄集，以相片紀錄整個製作過程。

電影版會延續電視版故事，馮導還公開內容，「劇集第7集，A班（Stanley做隊長）同C班（Edan做隊長）已夾埋一齊，Stanley組成一隊校隊，去對抗 Angela（袁澧林）嗰間名校，仲喺對方80周年校慶時擊敗咗佢哋，令對方好冇面，就搵Ansonbean同朱鑑然過嚟復仇，故事發展係嗰邊愈嚟愈多高手出嚟同佢哋對壘，但當時Edan同Jeffrey（魏浚笙）已經反咗面，Ansonbean挑戰佢哋，令到佢哋要合力對抗，而Stanley高水平畀人拔尖，畢咗業去外國集訓。」

電影版的《I SWIM》，主要講Ansonbean同朱鑑然向Jeffrey和Edan等人下戰書。

馮導指水底拍攝，成為該劇拍攝最高難度部份。

讚Jeffrey有天份

馮導大讚孭飛的Jeffrey（魏浚笙）及Edan（呂爵安）表現出色，特別是首次演繹重要角色的前者，令他相當驚喜，「大家有個錯覺及傳統觀念，靚仔啲戲就唔得，我喺導演會開會嘅時候，全場導演輪住問我，佢哋知道有呢個人，問我佢啲戲得唔得，我話好到不得了。我初初都擔心，因為佢第一次咁重戲，完全喜出望外，佢好有天份，真係冇揀錯，搵到Jeffrey等如《狂舞派》搵到顏卓靈一樣。」

馮導認為Jeffrey和Edan，都是有潛質的新一代演員。

至於獲前輩大讚的Edan ，馮導亦覺得他是可造之材，「佢好聰明，你一講佢都明，好記得casting個場戲，佢係隊長同大家開會，佢太有禮貌，每個人講嘢佢都畀反應，我同佢講你作為隊長，聽到真係需要畀反應你先至畀，自然個隊長氣質出咗嚟，同佢講佢會明，之後就做到個領袖感覺出嚟，大家冇見過佢呢一面。同埋佢記憶力好好，一日咁多場對白都記得晒，我寫都唔記得晒，哈哈！」

Stanley和Alton在試鏡時的突出表現，令馮導無法不選他們。

另外兩位MIRROR成員Stanley（邱士縉）和Alton（王智德）同樣踏入3字頭，依然獲揀中演中學生，馮導就解釋：「睇完第2集就會明白點解要搵佢哋兩個，冇人會再問呢個問題，其實佢哋唔係負責校園嗰part，係運動員嗰part。」他又讚兩人在試鏡時表演出色，而Stanley更加是最早定案的人選，「我哋攞一場戲試，佢第一take係完全錯晒，但係我講咗個問題喺邊度，佢去到第二take完全變成另一個人，咁我知道佢係一個演員。」而馮導就覺得Alton勝在有感染力，是該劇必需人腳。