古天后日誌｜大市方向未明 且看50日線能否收復

7月13日，天晴，天氣酷熱。美股隔晚偏軟，三大指數下跌，雖然三大指數跌幅少於1%，但日升日跌方向未明，已開始令投資者卻步，每日成交額正縮減。債息重上3厘，長短息繼續倒掛，係經濟陷入衰退嘅警號，踏入業績期，市場將跟據美企業績，去決定投資策略。市場預期標普500間公司收入增長約10%，盈利增長4.3%，數字較3月底時所預測5.9%有所下降。

除咗美企業績或反映，商品價格回落，亦反映經濟或陷入衰退，而銅價早已率先回落，6月銅價跌穿9000美元後，一個月內價格跌兩成後未見反彈，除咗係炒作熱錢流走之外，需求急降亦令價格一沉不起。高盛預期未來3個月要再跌10%，銅價見頂回落，反映未來半年經濟或急速下滑。

另一個重要商品價格為油價，古天后已多次強調油價喺120元水平已接近見頂，事實上油價亦已經係強弩之末，隔晚油價更急跌至94美元，跌幅超過7%，一旦跌穿90至92美元重要支持位，經濟放緩已可確認。

油價回落緩解通脹壓力

而過去數月通脹高企，其中一個主要原因為油價高企，油價回落對通脹壓力有所緩解，不過通脹數據或有滯後，今晚美國將公布6月CPI數據，上月呢個數據，意外地上升至8.6%，市場估計6月CPI或進一步升至8.8%，即使油價近日回落，CPI或要待8月先見頂，若然通脹回落速度，不及經濟下滑速度快，就有機會陷入滯脹困局。美股喺咁嘅情況之下，暫時易跌難升，資金似乎傾向流入債市，尋找更穩健已可靠嘅投資產品。

至於中港股市呢邊，自從上月底完成半年結粉飾櫥窗後明顯轉弱，當時成交未見顯著增加，只係有少量熱錢流入推高價，隨住半年結完成，呢啲熱錢亦流走，形成港股喺呢段時間表現偏軟。

反而值得留意係，喺美國收水之際，資金傾向轉換為美元資產，唔少重磅股股東相繼減持港股套現，南非股東已表明要減持騰訊(00700)，而阿里(09988)喺CCASS亦有大批貨泊咗入美資行，雖未見主要股東軟銀有任何減持行動，呢泊咗咁大嚿貨入CCASS，難免令人心情忐忑不安。而最新一單係比亞迪(01211)嘅CCASS見異動，有2.25億股貨轉咗入花旗，呢批貨嘅數量跟股神巴菲特持股量不謀而合，令人聯想到股神會否想沽貨套現。雖然目前未見股東有披露減持，但由於交易T+2，減持未必即時有update。

當然市場另一說法係股東可能借貨畀人沽空，又另一個講法係為避免任何制裁而調倉至美資行，不過呢啲全部都係揣測。喺呢手貨去向未明之際，比亞迪股價難免受壓，暫時250日線喺259元，即管睇睇呢個位守唔守得住，一旦失守，股價跌勢將加劇，暫時唔建議接飛刀，有貨喺手就守住先，始終基本因素無乜大改變，而比亞迪仍然係新能源汽車股首選。

古天后

(徐狄怡，證監會持牌人)