獨家丨謝安琪陪額傷囡囡縫6針聲都震晒　探訪家舍深刻體會病童父母感受

2022-07-14 07:00

謝安琪（Kay）最近為「麥當勞叔叔之家慈善基金」獎券義賣活動，擔任星級義工隊長，日前她到「麥當勞叔叔之家」探訪，除帶《星島頭條》記者參觀家舍環境外，還陪患有腦腫瘤的6歲小妹妹阿怡講故事及填顏色。由讀書開始已熱心做義工的Kay，表示做了媽咪後，見到病童感受特別深，她又自爆早前細女張靖（Karina）跌爆額頭，她陪囡囡縫6針時成身震晒，心痛感覺令她好難忘。採訪：杜杜攝影：沈健程

Kay為「麥當勞叔叔之家慈善基金」獎券義賣活動，擔任星級義工隊長。

Kay大讚「麥當勞叔叔之家」的家庭房設施齊全。

當日，Kay先詳細講解家舍的設施及環境，希望令更多人了解這個地方，「爸爸媽媽可以同小朋友一齊，喺接受治療期間互相照顧，小朋友康復期間，家人支持好緊要。」

家舍的廚房好大，Kay笑指經常探訪都會聞到香味。

小讀中學已做義工

Kay對家舍相當熟識，因她多年前已為慈善基金擔任過宣傳大使，之後更經常跟老公張繼聰去探訪，「除咗探訪，仲會喺新年前嚟派利是，嗰種支持唔係好物質，真係想將祝福好直接送畀小朋友同佢個家庭。」入行後經常參與慈善工作的Kay，早在中學階段已是學校義工團成員，「會去醫院長期病患病房，唱歌畀啲小朋友同老人家聽，喺佢哋牀邊同佢哋傾吓偈，入行後，作為歌手參與活動會得到多啲人注目，發揮力量更大，更加要做多啲。」

2012年，阿聰探訪「麥當勞叔叔之家」時大受小朋友歡迎，齊為他除去手上紋身。

Kay向阿怡大講「家Fun熊」的故事，聽到阿怡入晒神。

探訪期間，Kay先送上「家Fun熊」給阿怡，再跟她講故事、填顏色。阿怡開心表示：「好鍾意同Kay姐姐玩。」記者跟阿Kay訪問期間，阿怡亦全程陪伴在側。做了媽咪的Kay，面對病童時更能體會病患父母感受，她自爆幾個月前細女Karina不幸撞傷要入院縫針，令她嚇餐死，「個女喺出面玩時跌親，額頭破開咗，流咗好多血同傷口好深，我當時揸緊車去搵佢哋，諗住匯合一齊去食飯，但打極電話都冇人聽，原來佢已經流血流到個人蒼白晒，等緊救護車，咁細個傷口都縫咗6針。」

阿怡全程陪住Kay做訪問，期間更好快手完成填色。

Kay跟阿聰育有15歲長子張瞻和5歲細女張靖，她慶幸兩個小朋友都冇乜病痛。

讚張繼聰「神隊友」

Kay說當時只是故作鎮定，手同把聲都震晒，「嗰刻你一定要畀支持小朋友，佢嘅最大力量嚟自你，我隻手扶住佢都要叫自己唔好震，其實好想喊，把聲震晒，喺佢縫針期間仲同佢講笑，其實好難做到，但係一定要做到。」好彩她身邊有個「神隊友」張繼聰，「我哋好似唱雙簧，佢喺呢方面都好叻，口才了得過我，阿女都好叻，縫完針唔痛，最終仲返到間餐廳食飯，竟然處理晒件事，啱啱到我哋張枱，小朋友仲好肚餓𠻹！」雖然囡囡只是皮外傷，亦好快冇事，但已令Kay心痛好耐，「呢個經歷好難忘，自己流血都唔覺得咁痛，阿女之後已經冇嘢，但係唔知點解嗰個禮拜我個心好翳，每次一諗起佢整親個場面，即刻好頭痛。」

Kay跟囡囡關係好好，經常一齊玩黐到實。

Kay澄清囡囡其實都好錫老公阿聰，只是冇表現得咁明顯。

阿怡趁着Kay訪問期間，已將一幅畫填好色，令Kay好驚喜，大讚她好犀利完成了滿分作品。見Kay好識𠱁阿怡，看來是平時陪仔女訓練有素，問她𠱁小朋友咁叻，會否令老公被比下去，所以經常在社交平台呻囡囡黐媽咪？Kay就解釋囡囡好識睇人，「個女係知道我脆弱啲，佢會就我，會特別錫我，表達得明顯好多，佢唔係唔錫爸爸，佢只係知道點對爸爸都係笑笑口㗎啦！佢係有啲小聰明，對我嗰種唔係分錫邊個多啲，而係知道我哋性格唔同。」