回歸丨郭晉安酷熱下戶外宣傳未感辛苦陳煒熱到底褲都濕埋

2022-07-16 18:00

郭晉安（安仔）、陳煒（煒哥）、吳偉豪、陳曉華、游嘉欣、陳嘉慧等出席「為香港喝采」花車巡遊，為TVB劇集《回歸》宣傳。眾人先在金紫荊廣場向粉絲派發禮物，在30多度的酷熱天氣警告下，眾人也應粉絲要求拍合照，繼而大隊隨開篷巴士巡遊經銅鑼灣再到終點站太古城，沿途向途人揮手，吸引了不少途人歡呼。而何廣沛就避甩「暴曬」，能夠直達終點的食肆貴賓房嘆住冷氣等候。

《回歸》一眾演員在金紫荊廣場向粉絲派發禮物。

幾乎全員出動。

今日天氣好熱，但郭晉安同陳煒都唔怕辛苦。

提到高溫下戶外宣傳相當辛苦，安仔謂：「有乜未辛苦過，尤其係7月時份響內地橫店拍古裝戲，雞蛋都會嚮地下爆開，仲睇住臨時演員逐個中暑『呯』一聲暈低被抬走。而我就未試過暈低，因為中暑前有飲水，休息半小時就冇事可再開工。」煒哥自言中暑最嚴重一次是拍《雙生陌生人》期間，感到眼前變黑白及雪花，隨即要坐低休息。今日煒哥亦好醒目，專誠穿透視裝衣現身，但煒哥透露仍然全身濕透，連底褲都濕埋。由於天氣太熱，巴士上層的座椅都曬到熱焫焫，因此她於巴士上層全程站立做宣傳。安仔亦稱有準備，特別着多件底衫索汗。

郭晉安話夏天喺橫店拍戲仲辛苦。

好多粉絲支持。

巴士上層的座椅曬到熱焫焫，個個都唔敢坐低。

不過辛苦做宣傳是有回報的，劇集首播有18.2收視，安仔讚劇集感人又貼地，劇情於許多真實家庭中時有發生，希望收視能節節上升。煒哥更豪氣指收視理想可穿比堅尼慶功，而安仔就鬼馬指穿泳褲配合亦可，但要視乎甚麼年代，心水選擇偏向保守。此外，9月將出嫁的煒哥正在放假，忙於執拾搬屋，透露本星期將搬到新居，下月就要繼續開工拍攝台慶月播放的飲食新節目，與不同的廚藝高手合作，還即場邀請安仔，指安仔在《回》劇中「拋鑊」有功架；安仔就笑抛起煒哥也可以，因煒哥很輕，反而鑊很重、抛到他手抽筋。