獨家丨鄧達智睇唔過眼指林作膚淺 用近代史揭開陳凱琳胞弟「西樣之謎」

早前，似外國人多個似中國人的陳凱琳龍鳳胎胞弟Derek曾被林作抽水，揚言出1,000萬要陳凱琳父子驗DNA做親子鑑定。熟知中西史的時裝設計師兼作家鄧達智（William）睇唔過眼，覺得林作太膚淺：「中國人漂泊去過太多地方，DNA隔兩代先走返出嚟一啲都唔奇，上幾代經歷咗啲乜冇人知。」他認為，只要了解多啲中國近代史就明晒，冇必要大驚小怪。採訪：方騫平 攝影：沈健程

兩年前鄧達智曾寫下著作《衣路歷情》和《THROWBACK》，獲「第十四屆香港書獎」。

陳凱琳有「鬼妹樣」，龍鳳胎細佬就偏似印度人，但陳凱琳姐姐及父母就有中國人樣。

林作揚言出1,000萬要陳凱琳父子驗DNA做親子鑑定。

鄧達智以往出過超過17本唔同主題嘅著作，今年書展再推出用圖文對照嘅《再見再見再見》，以深情角度，重溫踏足過嘅地方，寫過去人和事。原先還打算寫一本探討已故媽媽外家血統故事的書籍《比百年更孤寂》，但疫情下計劃趕不上預期，飛唔到去厄瓜多爾尋根，故無從落筆，只能延至明年再算。

鄧達智以往出過超過17本唔同主題嘅著作。

祖先去南美洲搵食

出身鄧氏大家族的鄧達智，歷代有族譜記載，反而媽咪家族嗰邊資料唔多，因為外公嘅爸爸喺「黑鬼埠」死得早，家族資料不詳，他只知道媽媽嘅爺爺死在「黑鬼埠」，亦相信外公嘅爺爺好大機會都同樣死於當地，同時知道媽媽有外國人血統，而表弟屋企嘅先人位有個鬼婆名，直至十幾年前，居於加拿大的疏堂親戚，曾經去過厄瓜多爾同當地親人團聚，他又聽姑婆講過，早於他曾祖父年代好大機會已去咗南美洲，後來曾祖父仲返嚟帶埋族中兄弟過去謀生，而兄弟後人部份返咗香港，部份仍留在當地開枝散葉，他感慨說：「喺清末時期好窮，為咗謀生乜地方都要去，中國人去過好多地方，因為清末已有遠洋輪船去太平洋，而秘魯更加係太平洋沿岸最早嘅海港之一，所以有啲華人被『賣豬仔』去到秘魯做苦工，辛苦到嘔血身亡，唐人真係好慘。」

鄧達智媽媽有外國人血統，年輕時輪廓好深。

隔兩代遺傳唔出奇

因此，William認為陳凱琳細佬生得似外國人一啲都唔出奇：「林作都傻嘅，佢只係認識近代華人歷史太少，DNA隔兩代先走返出嚟一啲都唔奇，好似我咁，細個曲髮似南美洲人，但對下個細佬單眼皮白白淨似足北方人樣，而喺厄瓜多爾開廠嗰個細佬就有墨西哥人樣，我啲姊弟有啲都似歐洲人，媽媽長滿白髮時變咗鬼婆，其實上幾代經歷過啲乜冇人知，華裔唔單止出現喺美國、加拿大，甚至遠至中美，南美嘅墨西哥、秘魯、古巴、加勒比海、牙買家等，印度嘅加爾各答曾經有好多華人生活㗎，只不過冇嘢記錄佢哋，形成有百年孤寂。」

姊弟六人與爸媽最後一張合照，部份姊弟有歐洲人樣。鄧達智(後左一)，幼弟（美國）(左二)，三姐（英國）(右二)，二弟（加拿大）(右一) ；二姐（加拿大）(前左一)，父親(前左二)，母親(前右二)，大姐（加拿大）(前右一)。

母親最後一次回多倫多參加孫兒大學畢業禮。鄧達智(左一)、母親(右二)、二弟 (右一)同行，二弟個樣似北京人。

鄧達智話媽媽開始有白頭髮後變得鬼鬼哋，而他就有南美洲人樣。

另外，新書《再見再見再見》寫過去的人和事，仲會重提做過頸椎大手術、患上大腸癌及確診新冠肺炎嘅心路歷程，但怕肉麻隻字冇提伴侶陳醫生(陳梓欣)。

2014年他患上乙結腸癌二期，入院切除3厘米大的腫瘤。

11年前鄧達智曾接受頸椎手術，留下7吋傷疤。

 

2018年鄧達智出過著作《星星指引孤身上路》，書中談及伴侶陳梓欣。

星島新聞集團慶回歸25周年專題網站，請即瀏覽

立即下載 | 全新《星島頭條》APP : https://bit.ly/3yLrgYZ