獨家丨譚俊彥最開心做回自己暖男形象煞食月餅廣告宣揚正能量

2022-08-03 06:00

「視帝」譚俊彥成為新一代月餅品牌代言人，有傳廣告商看中他的「暖男」形象，他以200萬酬勞取代陳慧琳，他稱不要用「取代」這兩個字，酬勞亦不便公開，多謝廣告商畀機會，之前他要返內地工作，今次合作是排除萬難。他最開心在廣告中做回自己，不需要扮其他人，故事屬於他和家人，而且宣揚家庭團圓的正能量。文：余潤娟、圖：譚志光

有傳譚俊彥收200萬酬勞拍月餅廣告。

譚俊彥（Shaun）大讚廣告的劇本寫得好好：「事前與導演沒有溝通，但寫出來的劇本好感動，講經常到外地工作的爸爸，如何與家人維繫感情，拍廣告時最感觸是聞到嗰嗰味道，每個人細個對某種味道特別敏感，當我聞到蓮蓉的味道就會諗起公公婆婆，自小由公公婆婆湊大，中秋節一家人團圓吃月餅、玩燈籠的感覺返晒嚟！」

他說如果不用開工，今年會帶仔女到西九龍的草地賞月。

去年中秋節他與家人到官塘海邊賞月，兩個仔女一直記住當晚的月亮好大，好想再去，他笑言細個給仔女特別記憶，將來長大每逢中秋節都會諗起父母。今年中秋節他想一家人Staycation，但他未知是否需要開工，所以遲遲未能訂酒店，他指出不用開工會帶仔女到西九龍的草地，簡簡單單野餐吃月餅、玩燈籠，給小朋友感受中秋氣氛都好開心。

譚俊彥好希望畀到仔女特別回憶。

爆嚴父狄龍勁寵孫兒
Shaun的工作已排至明年年底，可謂豬籠入水，他戲言學費好貴，入行多年也望工作及收入穩定。「之前自己的工作不穩定，令公公婆婆擔心，他們離世前未有機會在TVB看到我的劇集有點遺憾，婆婆話走就走，好想同佢講唔使擔心我，可惜沒機會！早年網上曾流傳我爸爸離世的消息，我都諗過爸爸離世會點？去年台慶頒獎禮諗過不請父母出席，因事前完全不知有沒有獎，不想他們失望，最後唔理咁多，這刻好希望與他們分享，不想再有遺憾！」

Shaun的父親狄龍是一個嚴父，更是家中的話題終結者，他說爸爸近年已放低好多，尤其見到孫仔孫女，就算孫仔頂嘴也不介意，當他教小朋友時，爸爸叫他不要嚇親小朋友，他笑言自細被爸爸嚇大，現時如此寵孫兒！有感父母年紀大，他希望疫情盡快過去，自駕遊帶父母、太太及仔女到歐洲旅行，給家人一個好好回憶！