Locker染金髮戴Colour Con突變型棍岑珈其激讚：咁靚仔真係好咩

2022-08-15 20:30

2016年，林家熙（Locker）憑電影《點五步》踏入演藝圈，2020年底加入網台「試當真」，入行6年Keep住有作品面世，當中有劇又有電影，雖然唔係做主角，但好多角色都好受歡迎，例如《IT狗》嘅富二代角色「開開」，仲係好記得。

Locker形象一向斯斯文文。

去年，Locker公開跟「試當真」成員吳家忻（Kayan9896）戀情，之後兩人經常在社交平台放閃，又寓拍拖於搵錢，情侶檔狂接廣告，攞正牌親熱，羨慕死好多連登仔。

拍住拖搵錢最開心。

寫咁多字都係為咗舖排講Locker個新Look，佢形象一向無乜特色，唔知佢為新戲定自己想轉吓形象，碌吓IG見到佢染咗金髮，仲鏟短晒頭髮兼戴埋Colour Con，成個Look好似啲戲入面企喺啲黑幫大佬隔離嘅百厭鬼仔咁，口多多嗰隻，總之幾型棍，圈中老友都讚佢呀，好似麗英就讚佢有型，之前被人踩醜樣嘅岑珈其就問佢：咁靚仔真係好咩？ANSONBEAN同卓韻芝都表示好欣賞。