古天后日誌｜北水再撤出港股 港股陰乾下死路一條

8月23日，天晴，日間天氣酷熱，部份地區有煙霞。早幾日古天后講咗，當美股發展到劣幣驅逐良幣，重磅一線股已乏上升動力，市場轉炒二三四線股，甚至迷因股嘅時候，小心音樂椅遊戲嘅音樂隨時停落嚟。話口未完，美股承接上周五跌勢，隔晚跌勢嚟得更急，道指跌643點；標指跟納指則跌逾2%，分別跌90點及323點。一直強調美股仍處於熊市之中，而熊市嘅特色就係當中嘅反彈力度可以相當驚人，甚至挾到淡友懷疑人生。

被喻為今年美股最準分析師之一嘅美國銀行策略師Michael Hartnett認為，美股仍處於熊市之中，可能要到明年先至真正見底。佢表示自1929年以來，標指於43次熊市反彈中平均升幅為17.2%，持續時間為39個交易日。而今次，標指喺41日內漲幅達到17.4%，其實美股已處於反彈區間頂部。

港股陰乾 易跌難升

不過美股急跌，並唔等於今日港股要跟跌，喺噚晚美股腳軟之際，反映中概股嘅中國金龍指數走勢尚算堅挺，只要ATMJ呢幾隻重磅科技股仲頂得住，港股可能都係一兩百點之內上落，並唔會跟美股出現2%嘅跌幅。但港股市底偏弱，就算唔大跌，今日都好難有乜嘢表現，要睇住19500呢個位守唔守，今個月19500呢個位已考驗多次，如果喺下周期指結算前失守，今個月好大機會以低位結算，並再下考驗19000至19200水平。

雖然內地噚日已減LPR變相放水，內房股噚日叫做有得反彈，但銀根短缺債務問題，仍然未能解決，暫時只係幫到部份財政狀況較佳嘅內房頂住先，呢一個內房債務炸彈一日未拆除，呢個板塊仍受困擾，港股整體資氣氛亦難以逆轉。

另一方面，港股低迷嘅成交額，繼續令港股偏軟，外資一早已拒絕再玩，而北水亦見半放棄狀態，近日屢次錄得北水淨流出，若果連北水都撤底放棄港股，成交持續萎縮，港股就只有陰乾，易跌難升。

古天后

(徐狄怡，證監會持牌人)