獨家丨導演吳炫輝望5年港科幻片衝出國際電腦特技人才已達荷里活級

2022-08-29 07:00

由古天樂監製首部港產科幻片《明日戰記》，未上映已成話題，這部花10年達4.5億巨製，擁古仔及劉青雲、劉嘉玲張家輝等卡士，作為新導演的吳炫輝承認好大壓力，但難得有古仔全力推動，令香港電腦特技突飛猛進，吳炫輝認為香港人才已達荷里活級數，只要keep住製作，香港科幻片有望5年後衝出國際。採訪：杜杜攝影：Stanley

2006年《鬼域》、2008年《投名狀》、2010年《風雲II》令吳炫輝奪得金像獎最佳視覺效果，而《投名狀》更同時獲亞洲電影大奬及金馬獎。

作為新導演面對這種卡士及製作費，吳炫輝承認壓力超級大。

曾三奪金像獎最佳視覺效果，當中《投名狀》更同時獲得亞洲電影大奬及金馬獎，吳炫輝絕對稱得上香港、甚至亞洲電腦特技方面大師。十多年前他經陳輝陽介紹下，認識對電腦特技超有興趣的古天樂結為好友，十年前古仔跟他提議不如嘗試搞套香港科幻片，他承認當時香港技術未達水平，「當然十年前係天方夜譚啦！」

戲中經常出現的這種巨型裝甲車，設計及製作是以年計。

張家輝這個特技化妝造型，原來是他主動提出，望表達角色固執性格。

20年科幻片計劃

吳炫輝承認正因這部電影，令香港電腦特技水平急速進步，「冇呢個計劃係唔會行，因為冇需要去做呢件事，始終投放嘅嘢唔小，每樣嘢牽涉都係製作費。」他承認本地技術人才不缺，只欠資源、資金同時間，所以對於有人認為香港拍科幻片唔入流，他就反駁，「代表特技行業公平啲講，我哋付出嘅時間同精神，唔少得過荷里活，而且能力絕對唔係低於嗰邊，只不過我哋嘅經濟環境、巿場冇佢哋咁有資源，我公司或者友好公司，好多同事都去過嗰邊做過四、五年先返番嚟香港，證明佢哋係做到，都係做緊嗰啲嘢。」所以他認為香港科幻片要衝出國際不是夢，「如果我哋繼續做落去我哋係可以做到，我諗五、六年後。」

吳炫輝讚古仔是個有遠見又坐言起行的老闆，成為他好好的推動力。

電影拍攝時間只花了四個月，但前期加上後期製作時間長達10年。

吳炫輝承認古仔keep住做科幻片的計劃是長達20年，「佢個嘅性格係一傾就二十年，佢知道呢個係引發點，一步步行，而每部電影講緊三、四年，當有五套呢啲戲要做，廿年都過啦！」除了《明日戰記》外，吳炫輝會再為古仔執導新作《尋秦記》，他大讚對方是個老闆，合作開心多於爭拗，因對方好明白特技需要是花時間，他更笑指他完全冇老闆feel，「佢個外型咪係囉！但係實際冇嘅，乜嘢都講得，我屋企啲細路都同佢講得㗎！」