獨家丨葛民輝拍住凌文龍片場棟篤笑自爆性格文靜鍾意聽浪聲

2022-09-14 07:00

葛民輝近期同MC（張天賦）及凌文龍(小龍)拍攝新片《夜校》，《星島頭條》突擊探班，好耐無拍戲的阿葛全程表現風騷，孖住小龍同陳紫萱（Summer）受訪時好似表演棟篤笑一樣，拎住隻道具膠手係咁揈，仲興奮到講埋諧音粗口，搞到小龍笑唔停。

齋睇阿葛呢個樣，已經覺得好搞笑。

阿葛形容今次《夜校》中角色「人唔以人，鬼唔似鬼」，問到佢同角色有冇相似地方時，佢話同角色一樣咁文靜，「我本身都鍾意喺石澳海灘聽吓浪聲，同埋平時都會同劉德華一齊練吓書法咁，吟詩作對拉二胡。」

阿葛同小龍及MC，在電影《夜校》中初次合作。

戲中 Summer因為唔鍾意男友小龍成日黐住MC，覺得兩個廢青好唔長進而大鬧佢哋，Summer話好想做金絲雀俾人照顧，阿葛即發表偉論，「佢𠵱家係手撕雞，暫時入咗戲，原先個金絲雀仲喺個元神嗰度未抽離到，佢哋兩個（Summer同小龍）主要無啦啦多咗個人（MC），令佢覺得小龍唔長進，拉埋個MC 嚟搞我呢單嘢，更加嬲，我好明，因為我全程喺度偷聽嘛！我喺度做CCTV，咩都畀我看透晒，啲底衫底褲咩顏色我都知，我唔講啫！」

阿葛拍住小龍做訪問時，一唱一和相當合拍。

小龍聲稱戲中係個天才科學家，記者一睇就知佢係「自己覺得」，阿葛又再發功，「你好似洞悉到啲嘢，女仔啲眼係有X光，好似啲阿媽見你放學返嚟，你係咪做咗啲壞嘢，吓！點知嘅阿媽你，我咩都未講喎！」

阿葛孖住小龍同陳紫萱（Summer）受訪時，好似表演棟篤笑一樣。

講到小龍同Summer戲中的動作場面，阿葛就親自解話：「放心佢哋唔會有家暴，我睇得出佢哋兩個係喜歡，佢哋係有啲SM feel，你睇呢度(拍攝現場)都知，有電鑽啦，有工人衫，有咩兩夫婦間屋會咁，平時應該係吊高嚟，你見到個牛頭馬面，你就知平時吊住喺嗰度啦！哈哈！鞭我啦！無啦啦點會放喺張牀嗰度，風水咩？！大家唔好試，頭先我試過唔穩，呢度啲嘢都唔好掂，嗱喳，黐黐立立咁。」

阿葛話今次角色好文靜，真係郁都唔郁。

就「動作場面」阿葛仲未講完，棟篤笑繼續，「（電影）出街嗰90分鐘係冇嘅，平時我哋試戲啲閨房戲拍晒，如果唔係點會無啦啦有幕有雪櫃，我無啦啦要入雪櫃，佢哋玩到入雪櫃玩，連我都要玩埋，點解呢？導演你拍緊咩呢？呢度地方細，隔離屋會聽到，放我入雪櫃搵我嚟試隔音，真係冇奶油（理由）！」
TEXT:星島頭條娛樂組