獨家丨顏卓靈經常崩潰爆喊嚇親吳海昕小齊拎牛肉刀教戲蘇麗珊遇邪嘢

2022-09-20 07:00

驚慄片《失衡凶間》結合3個詭異短篇故事《死場》、《唐樓》及《暗角》，其中以顏卓靈在《暗角》中角色最陰暗，經常崩潰爆喊，相當痛苦，不過坦言作為演員就係鍾意犯賤。吳海昕認為順帶發洩個人情緒會好啲，她又力證顏卓靈真係好入戲，配音時睇到對方演出被嚇親；至於蘇麗珊試戲時就遇到啲邪嘢，覺得好靈異。採訪：方騫平

吳海昕(左起)、顏卓靈、蘇麗珊於新片《失衡凶間》中各有發揮。

吳海昕、蘇麗珊、顏卓靈談拍攝花絮。

顏卓靈形容每個人心中都會有隻怪獸。

蘇麗珊拍《失衡凶間》遇邪嘢。

吳海昕認為拍戲順帶發洩個人情緒會好啲。

顏卓靈坦言作為演員就係鍾意犯賤。

吳海昕片中情緒轉變好大。

蘇麗珊好愛演戲。

顏卓靈在《暗角》中飾演歌手，由於讀書時目睹墮樓者死不暝目造成心理陰影，長大後開始懷疑人生，內心出現好多鬥爭，尤其講到要還原經歷時，變得相當痛苦，但演得過癮，對她來說是一個突破：「其實每個人都有黑暗一面，好似有隻怪獸喺身咁，人性共通點係有善惡，唔攞出嚟講唔代表冇，睇吓點樣去處理，單純善良就唔會有戲劇。」

顏卓靈演情緒病人，有大量爆喊鏡頭。

日前《唐樓》導演馮志強率顏卓靈及植詠珊到戲院謝票。

片中阿旦幫她捉「鬼」。

不停爆喊好崩潰。

開始懷疑人生。

小齊演惡形惡相江湖大佬

吳海昕喺《唐樓》中演一位有神經質嘅小說家，所以不時會「跳掣」，情緒轉變好大，上一秒好惡下一秒就喪喊，而且要一鏡頭尾，好有發揮：「好彩有小齊(任賢齊)呢個好好嘅對手，及導演團隊令我加添咗信心，尤其同偶像小齊合作，好記佢見我有啲緊張，就行埋嚟提點我『有時拍恐怖戲唔使諗得太多，因為現場環境經已好得人驚，不如做少啲。』佢真係一位好照顧人嘅前輩，最搞笑當時小齊係做緊惡形惡相嘅江湖大佬，佢攞住把刀行過嚟教我，同佢扮相有好大反差。」

吳海昕做神經質作家，行為怪異。

小齊做江湖大佬，手持牛肉刀演出。

戲中小齊係唐樓租客，同吳海昕有對手戲。

另外，蘇麗珊於《死場》中做專爆人內幕嘅KOL，不停去商場做直播，期間發生唔少靈異事件。除咗要應付好長嘅對白外，掌握情緒都要明快，她表示拍攝期間發生一段小插曲：「原先陳果導演想我分飾埋孖生姐姐，當晚我喺屋企練吓講啲好有仇恨性嘅對白時，枱燈無啦啦唔正常咁閃，最後因為拍攝問題分唔到身做埋家姐角色，諗返唔知係咪個天有暗示。」