獨家丨周家怡李靖筠激讚鄭伊健工作態度及人品勁好爆男神被狂迷整蠱實錄

2022-10-07 08:00

周家怡和李靖筠（Gladys）在電影《深宵閃避球》中首度合作，兩人最開心可以跟男神鄭伊健一齊拍戲，仲大讚對方工作態度及人品都相當好，更公開9個「瘋狂粉絲」整蠱伊健的爆笑實錄。採訪：杜杜攝影：羅安強髮型：Vincent Yeung(家怡)、Zivyeunghair@leonardo3haircorner(Gladys) 化妝：Herman Ng(家怡)、Angel Mok(Gladys) 服裝：Ports International(家怡)、@sandroparis#sandroparis@purplepr(Gladys) 場地：PHENOMENON WINE·DINE (The ONE)

家怡跟Gladys首次合作相當愉快，仲想快啲有下次。

家怡和Gladys回憶拍攝過程，好多笑料分享。

家怡近年多演硬淨角色，今次難得溫柔她好擔心觀眾不接受。

愛做健身的Gladys，原來特別努力練個翹臀，「胸大細係阿媽畀你，但pat pat係可以靠自己努力搵返。」

戲中家怡飾演單純又熱血的社工「楊姑」，做慣硬淨角色的她都擔心觀眾反應，「我成日做啲角色都好似好英明、好決斷，同一時間處理好多事，好似好勁，突然間做一個好純樸，選擇自己想聽咩嘅人，唔知觀眾會唔會覺得『扮嘢喎你！』，驚會有扮天真嘅感覺。」Gladys都笑指未認識家怡前，以為對方好cool，平日會戴黑超，「我以為佢好似（謝）霆鋒咁嘛！唔出聲，攞腳趾㩒鐘嗰啲，識咗後覺得佢真係好似『楊姑』，係好好嘅聆聽者。」

家怡演繹的「楊姑」，相信觀眾都好少見到她這一面。

「楊姑」這個角色，性格其實真係幾可愛。

Gladys怕觀眾睇到破綻

Gladys飾演反叛少女「紀文」，都擔心自己跟角色相差好遠，演起來觀眾會睇到破綻，「我係好難嬲，同埋好怕衝突，睇劇本冇覺得咁嬲，所以有啲心虛，我係勉強谷出嚟，唔係完全發自心底，唔知觀眾感唔感覺到啦！」相比她覺得苦練閃避球反而更容易，「閃避球係付出同收獲成正比，同埋嗰個月密集式咁練，一星期練三日，我哋冇乜點傾偈同揸流攤，所以都OK。」

Gladys在觀眾心目中的硬朗同倔強，好多時都係扮出嚟。

Gladys話練閃避球雖然辛苦，但愈練愈覺好玩。

家怡曾於2005年跟伊健合作劇集《隨時候命》，她大讚對方完全冇變，「佢性格真係好好，性格係贏晒，好真誠、humble，有嗰句講嗰句，又好照顧對手同台前幕後。」Gladys笑指伊健要面對她們9個「瘋狂fans」經常招架不住，「佢平時對住啲fans可以有助手擋一擋，但𠵱家冇計要日對夜對，對足一個月，我哋一見佢嗌『劉Sir』同唱歌，令到佢好尷尬。」