古天后日誌｜港股未能擺脫一浪低於一浪尋底格局

10月7日，短暫時間有陽光，間中有幾陣驟雨，午間天氣仍然炎熱。隔晚美股下跌，三大指數日前反彈至阻力位無法突破，果然再度掉頭回落。VIX回升至30之上，加上虛擬貨幣走弱，都反映市場情緒再度變得審慎，三兩日risk on過後，又回復risk off。市場再變得保守，係英倫銀行上星期話會臨時QE嘅方案，令市場誤會央行會減慢加息步伐，只係一場美麗嘅誤會，英倫銀行表示退本基金拋售500億英鎊國債，係防止基金爆煲，待風險過後，QE自然解除。如此一來，各央行嘅加息路線無變，只係市場主觀願望，想央行放水。留意今晚美國公布就業數據，一旦就業市場狀況唔係太差，美聯儲局自然有條件繼續加息。

相對美國嘅情況，歐洲更加水深火熱，雖然美國通脹高企達8%，但歐洲嘅通脹去到雙位數字，主要係能源問題。自俄烏戰爭爆發後，歐洲天然氣供應緊張，荷蘭可能關閉歐洲最大天然氣田，進一步減低天然氣供應，歐洲唔排除會出現大幅度缺電。英國國家電網警告，今年冬天英國可能無法從歐洲輸入足夠電力，先進國家都有可能搞到停電。歐洲天然氣供應緊張，OPEC一於少理，繼續減產以保利益，油價持續高企，呢個係通脹高居不下主要原因之一。IMF已呼籲各央行應保持激進加息去抵禦通脹，同時表示今次經濟一旦陷入衰退，至2026年全球經濟損失可能高達4萬億美元。

德國債息回升，美國債息亦連彈兩日，由3.56%回升至3.82%，而美聯儲局點陣圖顯示，美國年底息率將升至4.6%，而鮑爺亦明言明年唔會減息，目前亦無減息條件，美債息好難偏離4%水平，而值得留意10年息已長期高於30年息，債息長期倒掛並非好事。

至於港股假後激彈一日，噚日市況又回復淡靜，話咗周三恒指彈升逾千點，成交只有一千億左右，並未能配合升勢，港股好難再有follow，果然尋日成交額縮水至625億，完全暴露咗港股嚴重缺水嘅問題。港股跌至17000-18000水平，估值上好多股份已變得吸引嘅情況下，仍然無新資金進場，好明顯周三只係死貓彈，港股始終未能擺脫熊市一浪低於一浪，持續尋底格局。