獨家丨劉佩玥揀男友唔睇樣人品最重要陳曉華公開Cut機後丁子朗攬實佢

2022-10-20 07:00

劉佩玥（Moon）和陳曉華（Hera）在《美麗戰場》中跟陳瀅是由細玩大的好姊妹，Hera最初都擔心融入唔到，但好彩大家都屬直接的人，好快戲外都變好姊妹。講到劇中Moon被林盛斌（Bob）演的暖男狂追，Hera則遇丁子朗演的渣男，她們都話現實未遇過這情況，兩人仲分享自己的愛情觀。採訪：杜杜攝影：Stanley 髮型及化妝：Angela Shum(@angelashummakeup)(Moon) 服裝：Lilian Kan(@KanaLili)(Moon) 場地：Studio Meta

Moon讚Hera有種特質，會令身邊人好開心。

Moon認為就算跟富豪拍拖，都未必不是真愛。

Hera坦承演完「靜兒」，會更加清楚自己追求的愛情。

導演葉念琛要求三位女主角要做好姊妹對演出有幫助，Moon跟陳瀅早已認識，Hera最初都有壓力擔心融入不到，「過咗兩、三日就已經好friend，我諗係因為大家講嘢都好直接，絕對唔會搞小圈子嘅人。」Moon就大讚Hera加入起化學作用，令大家都好開心。而她們就爆經常被葉導睇死，「佢成日講『為你哋好咋！你哋唔好咁投入，拍完後就唔friend㗎啦！』」但她們有信心可以繼續維繫，因很珍惜這段緣分。

Moon和Hera稱葉導唔睇好她們跟陳瀅可以keep到姊妹情。

兩人跟陳瀅戲內戲外都成為好姊妹。

劇中「靜兒」和「小美」為仔反面。

擇偶重相處

劇中Moon演的「李靜兒」有義氣又男仔頭，雖然成日鬧人搞到好攰，但覺得非常好玩，又讚跟Bob演一對好開心，「我最深刻有場要攬住佢，好似攬緊熊bear bear咁，感覺係好有擔帶嘅男人，但佢攬返我隻手強而力，差啲鍊爆我肋骨。」問她若現實遇這種有錢但其貌不揚對象會否接受？Moon認為最重要真心鍾意對方，「嫁個有錢人都可以係真愛嚟，只不過佢係點樣嘅人品，同埋同你相唔相處到。」

Moon演「靜兒」真心攰，因角色的能量好大仲經常鬧人。

Moon話攬Bob似攬熊bear bear，聽見都覺得爽。

Hera話細個都似「林小美」一樣戀愛大過天，但未試過遇到渣男，甚至被打，「𠵱家最緊要相處到，我本身係個怪人，諗嘢有少少跳制，如果另一半組織能力比較差，可能唔知我講乜嘢。」她又大讚現實中的丁子朗是個暖男，「佢第一次真打落嚟，打咗幾巴，我喊得好勁，佢一cut機即刻畀個擁抱我，令我對佢信任加強咗好多，最怕對手好冷漠咁行開或者只講幾句，冇關心我情緒，但佢咁做覺得好窩心，好舒服，對手好尊重我，會令我對佢信心大增。」