Juicy叮｜為張電競椅港男同拍拖6年未婚妻退婚兼賣樓 網民撐唔撐？

有港男日前於網上發文談及自己的人生大事，指因為一張電競椅而看清拍拖6年未婚妻的真面目，決定退婚兼賣樓，與女方畫清界線，期望將來找到個會尊重人的好女仔。看過長文告白後，無論是男網或女網友均以大比數力挺樓主，有多位網民更自揭私隱，吐露婚後心聲與心得；不過亦有網民力勸冷靜「諗清楚」。

網民自揭私隱和留言請點擊組圖瀏覽：

樓主放上的電競椅遺照。網上截圖

樓主獲女網民力撐。網上截圖

有女網民順道大談夫妻相處之道。網上截圖

樓主獲大部分回應的網民支持。網上截圖

樓主被網民讚「做得好」。網上截圖

有網民勸樓主冷靜。網上截圖

網民晒幸福，展示自己的電玩房。網上截圖

網民展示家中的電玩閣。網上截圖

網民為回應樓主，自揭私穩，展示家中角落。網上截圖

有網民強調「無人可以搞我個玩具櫃」。網上截圖

一位與未婚妻一同買樓的男網民（下稱樓主）日前在「巴打絲打『00九吹專區』Facebook Club」以「感情問題我決定分手【長文慎入】」為題發文，指已入伙的新樓所有裝修都由對方話事，以「日系木調」裝修成「成間屋診所咁」。他繼而表示自己「唯一小小夢想就係有張打機專用電競椅」，但又深知未婚妻定會拒絕，於是決定先斬後奏搏一下，還想好了解圍對白「Maserati（馬莎拉蒂）超跑就買唔起，但總算買到佢張櫈！」

結果卻是「佢搵鎖匙掉我，逼我退番張櫈，話唔襯佢間屋，問我做呢件事之前有無諗過佢唔鍾意，有無尊重過佢」，但樓主在文中抱怨「佢裝修前都無問過我中（鍾）唔中（鍾）意診所風格啦，我都只係買一件，係一件自己心水傢俬啫，所以當下我堅持唔跪。」

故事未完......

到事發後翌日，樓主發現愛椅慘遭割爛，未婚妻冷冷地拋下一句：「而家解決咗啦，你攞張櫈落去掉，下次唔好嘥錢亂買嘢」，就是因為這般態度，樓主「突然睇清楚呢個女人」，並堅決退婚。接著的日子，樓主不但被未來外父痛斥，又被女方「癲咗咁日日100個miss call同千字文嚟鬧」，仲威脅起底。

獲網民同情

樓主的自述引起絕大部分回應的網民同情，指「佢唔識尊重人，好彩結婚前見到佢另一面」、「師兄，做得好！」。有女網民直言「嘩！我係女人都覺得好癲。男人有自己興趣同嗜好，係好事，點都好過搞搞震。」另有女網民更加貢獻自己的夫妻相處心得，指「成間屋既裝修風格同顏色都就哂我老公的，都係想佢多啲痴（黐）家」。

另有網民更有以紅字「恭喜」退婚，指「未結婚就咁樣，結咗婚仲得了？二個人一齊，唔係一個主一個僕，就算結婚十年，互相尊重都好重要。拍咗拖幾年就要話事，可見結咗婚，你都只係奴隸，分咗就算，恭喜你」。

不過事情亦分兩面看，有網民留下長長的留言力勸樓主冷靜：「其實我同你好似，女既霸道，男既細路仔脾氣衝動，分別係我無你既勇氣去悔婚，結婚果日我喊......親戚以為我感動而喊，結婚後我地成日嘈交，但嘈下嘈下又生左個女(超級乖 成績好)，嘈下嘈下又供甩左兩層樓三間舖收租，上帝閂你一道門，一定會為你開返另一道門，世界上 無兩個人，會好似鎖匙同鎖匙窿咁完全配合，只有用時間互相包容互相磨合，夫妻短短幾廿年，轉眼大家都變一排白骨，冷靜D諗清楚啦」。

今次事件除引起同情外還有共鳴，不少網民上載為自己精心打造的電玩房、電玩閣，甚至玩具櫃公諸同好大晒幸福，強調「無人可以搞我個玩具櫃，結左婚都係咁話」。

資料來源：
「巴打絲打『00九吹專區』Facebook Club」
https://m.facebook.com/groups/119187851842460/permalink/1593529191074978/
 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ