古天后日誌｜萬五水平成交增  好友現水平跟淡友抗衡

10月26日，天晴，天氣非常乾燥，晚上有時風勢頗大。美股隔晚繼續借業績炒高，道指跟標指升逾1%，納指終於追落後，發力升逾2%，睇返標指低位反彈咗一成，而道指亦進入超買區，小心美股開始反覆，博反彈嘅要見好識得收。繼唔唔少重磅股派成績表，微軟盤後公布業績好過預期，股價反而盤後跌6%，主要係市場見到其收入增速跌至五年以嚟最低，加上一半收入嚟自海外，喺強美元下，外幣跌到一仆一碌，微軟盈利以美元計算然出現倒退。至於交咗一份差過市場預期業績嘅Google，盤後股價同樣跌6%，即管睇睇兩股今晚能否先跌後回升。

隨住今年3月美國踏入加息期，聯邦利率上升之際，美國嘅房貨按揭利率亦已升至7%以上，樓下早於年中已下跌，不過租金跌幅卻有滯後，預期10月嘅CPI喺租金開始反映滯後跌幅時，就有機會見頂回落，呢個亦係美股投資者入場抄底買貨，再加埋業績期，美股近日回升嘅原因。

中概股喺周二大屠殺後，隔晚有些少反彈，只可惜港股喺ADR及夜期均未見起色，美股嘅升勢未能帶動港股反彈，好明顯港股仍處於弱勢。港股連續兩日喺大成交之下再跌，恒指跌至15000水平，咁大成交當然係大戶拋貨，皆因散戶一係資金被套牢，一係對港股已死心離場，大戶繼續狠狠掟貨，不過有北水開始入場抄底。只係北水買資嘅力量，仍不敵外資減持，淡友有持無恐，加上過去幾個月淡友已錄得巨額利潤喺手，更加無意放手作罷，令港股繼續跌跌不休。

留意周五係本月期指結算日，喺呢兩日轉倉高峰期，指數仍然壓住喺低位，但周一周二兩日成交都維持1500億水平附近，似乎低位好友已開始抗衡接貨，總好過之前每日成交只有幾百億元陰乾式下跌。港股能否喺15000水平搵到支持，暫時仍然係未知數，但近日低位成交有所回升，反映已有資金喺現水平入場買貨，目前環球基金喺港股配置偏低，而唔少港股亦已跌至合理水平，甚至蔗渣價，且看結算過後港股能否重上16000水平，若能重上萬六關企穩，港股或有望成功尋底。