古天后日誌｜港股能否轉勢仍要待結算後再作定奪

10月27日，天晴，日間天氣乾燥，晚上有時風勢頗大。隔晚美股早段因為微軟跟Google業績差過預期，拖累美股早段下跌，不過金融股做好帶動美股回升，三大指數盤中曾倒升，可惜科技股沽壓未減，收市道指幾乎抹去全部升幅，僅升2點；標指跟納指則分別跌28點及228點，納指再跌逾2%。噚日都提到標指已升抵反彈阻力，道指亦呈超買，美股表現將較為反覆，呢兩日美股表現正正如此。

美股業績期，明顯係科技股業績較為遜色，不過銀行股表現唔錯，未見不良貸款急增，而撥備做到足亦未見業績走樣，即係美國經濟唔再差落去，今年嘅撥備明年就有條件回撥並變成盈利。此外，摩根大通更預估下一季利息收入有望增加，息差擴闊就成為銀行股炒上原因。除咗銀行股估值低，息差擴闊下，未來喺利息收入增加下有望炒上，另一個原因係喺經濟陷入衰退下，加息速度或放緩。而加拿大央行剛剛宣布加息0.5%，少於市場預期加息0.75厘，美國或有望喺12月加息幅度降至0.5%，息口有望見頂係美股近日轉強原因。

美國10年期債息跌至4%，資金流出美元，噚日人民幣急升1000點子，日圓亦喺見過150水平後回升，都係美息見頂，美元可能回落嘅現象。人民幣急升，中概股終見似樣反彈，加上阿爺出到一行兩會一局，表示要加強各部門合件，維護股市、債市及樓市健康發展，中港股市噚日反彈。

不過港股仍然係弱底，明日期指結算，但恒指仍處於16000水平之下，淡友已立於不敗之地，噚日亦未能高收，好友反擊仍有難度，加上沽空仍大，估計喺期指算，港股難以有太大作為，可能都係受制16000關。不過已連續幾日成交額達到1200億元之上，北水連續淨流入，值得尊重。不過港股能否擺腳弱勢，完成尋底之旅再逐步反彈，要睇埋結算後，能否一舉升破16500至17000水平企穩。