謝寧拍古裝戲遭對手摸肚變摸胸？ 疑被男主角抽水片段出土逐格睇！
2022-11-07 14:00 
前港姐冠軍謝寧近日接受楊紹鴻和文頌嫻主持的港台節目《一起走過》訪問，當年港姐御任後，謝寧加入娛樂圈做藝人，參與過不少古裝劇的演出，被譽為「最靚古裝扮相」之一。楊紹鴻突然在節目上向謝寧公開道歉：「可能佢已經忘記咗呢件事，不過我都覺得要處理吓，嗰陣有場古裝戲，係話謝寧某一個人強姦咗，之後有咗bb，之後返去同老公講，本來係話謝捉住對隻手，擺落自己個肚上面，意思係話自己有咗，嗰個男主角係有好大反應。」他續說：「點知埋位變咗係男主角捉住謝寧隻手，由個胸掃落去肚，嗰陣謝寧塊面係黑晒，仲有啲想喊，我自己睇完都打咗個突，排戲都唔係咁，我唔評論佢係咪故意，亦唔講得佢係邊個，但係嗰陣我唔識得點處理，真係好唔好意思！」不過謝寧對這件事沒有印象：「我真係唔記得呢件事，原來我都畀人恰過，好彩我都唔記得，冇乜記性，可能嗰陣佢知我係妹妹仔，又係啱啱入行，如果而家我會即刻叫！」而楊紹鴻亦未有透露詳情，只在節目上開始時，稱與謝寧在蒙古相處過一段時間，當時是拍《成吉思汗》。
【點擊睇謝寧當日疑似被抽水的片段】：
在節目上重提參選原因，謝寧直言絕非因為名與利：「我唔識呢啲嘢，我記得嗰陣係好奇，加上做秘書同教琴嘅生活好苦悶，我成日覺得做人要靠自己努力，唔係要等人安排，所以咪決定報名試吓。」她又稱自己未有想過要演戲，純綷選完港姐便離開，問到當年的獎品是否很豐富，謝寧笑說：「嗰陣嘅獎品係有一架車，我好簡單諗住攞咗架車就走人！」
謝寧獲頒的后冠相當搶眼，不過有指當時的后冠由玻璃製成，直到1995年才正式獲得珠寶商的贊助，當年冠軍楊婉儀更是首位獲得以真鑽石打造的后冠港姐！而謝寧亦解釋：「其實屆屆都係玻璃，剩係有一年真係鑽石，不過幾多錢就唔知，我亦都唔記得係邊屆，其他咁多年都係玻璃或者會水晶，玻璃已經變晒色，權杖都係。」主持文頌嫻好奇問：「跌落地會爛晒？」謝寧直認：「係架，係甩頭甩髻，之後嗰幾年有人係有樓，我就冇。嗰啲珠寶公司贊助攞獎品其實都冇意思，同上獎門人攞獎品差唔多，你知嗰啲鑽石可以唔值錢架嘛，細細粒幾百粒嗰啲迷你鑽石，佢話做個心口針畀你，價值幾多十萬，但係問題係賣唔出，除非你拆咗佢，不過點都好有紀念價值，到依家我都有keep 住。」
謝寧小時候從內地移居香港，到了21歲參選香港小姐，成為第一位在內地出世的港姐，試過被人叫「謝燦」，謝寧說：「其實讀書已經畀人咁樣叫『燦妹』，細細個嗰陣梗係唔開心，而家睇番咪覺得得啖笑。嗰陣霑叔 （黃霑）真係好nice，佢喺報紙寫咗段文，覺得你哋呢班人嘅父母有邊個唔係喺係內地落嚟？邊個有資格咁講？而且內地好多人嚟到香港都有好多貢獻，點解要用呢啲字眼，我之後見到霑叔都有多謝佢，不過我都冇理佢哋，只係做好自己本份。」
【其他閱讀】
5大「御用丫鬟」近況 陳思齊曾整容失敗 有人嫁入豪門住8,000呎獨立屋
佘詩曼自爆為選港姐同阿媽炒大鑊 早前自揭「同居新歡」唔恨結婚
波波黃婧靈「封胸」文青Look霸氣側漏 薄紗透視難掩好身材引死網民
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應