古天后日誌｜港股再度重上萬八關 仍有望挑戰百日線

11月18日，隔晚美股表現反覆，早段因為聯儲委員鷹王出嚟放鷹，美股低開，標指跟納指曾逼近3900及11000點支持，守到支持位再回升，最終三大指數跌幅較早段大大收窄，納指跌38點，道指跟標指分別跌7點及12點。暫時標指未升穿4150牛熊分界線，一旦標指重返此水平企穩，美股有機會擺脫熊市再步入牛市。

美股能否擺脫熊市，關鍵係通脹能否受控，只要通脹受控，息口見頂，唔再鬧美元荒，咁各地股市就有運行。目前美國聯儲局要控制市場情緒，以防有資金狂炒油及大宗商品等，以免資源價格上升下，令通脹再度惡化，所以就算實際上美聯儲局已開始放慢加息步伐，仍不時會有官員出嚟放下鷹，做定情緒管理。至於美股由低位反彈，目前喺高位徘徊，表現將會更反覆，但只要標指守住3900，納指守住11000，後市仍有條件脫熊入牛。

雖然大型企業持續裁員，但未見美國就業市場惡化，目前仍有過千萬個待業職位提供被侍業人士，只係啲人選唔選擇較低時薪嘅工作，總之就業市場理想，美國經濟唔會差得去邊，呢個亦係支持美股死唔去嘅一大原因。

至於港股，噚日一度回落至17800水平之下，但主要支持位17400至17600未有再下試，其後喺夜期時段重上萬八水平，再隨美股低位回升，今日應該可以再次挑戰18400水平，若然呢個位能上破企穩，18800嘅100日線目標仍有條件繼續挑戰。當然嚟到18000水平之上，資金買貨唔會再咁進取。有人問港股走出熊市未，或者咁講，恒指從去年1月高位見頂回落，已足足調整咗22個月，而上月低位14600，亦較2021年高位回調超過一半，唔少癲炒股份，更從高位回落超過七八成，唔少股份目前估值已變得合理。

緊接騰訊(00700)交出一份表現唔錯嘅業績之後，輪到阿里(09988)公布季度業績，雖然表現平平，但都略勝預期，重點係公司加碼回購，隔晚已見ADR有空倉回補推高股價。接落嚟仲有京東(09618)跟美團(03690)嘅業績，從騰訊跟阿里業績後表現得出嘅套路，喺業績前都唔好手多多做淡，否則當空軍回補空倉，做淡嘅散戶就只有陪葬。