古天后日誌｜港股現水平整固 世界盃效應偏靜

11月22日，多雲，間中有驟雨，局部地區有雷暴，天氣較清涼。隔晚美股偏軟，今個星期四感恩節假期，周五黑色星期五只有半日市，市場等待周五嘅銷售數據，加上世界盃開鑼，市況更趨淡靜。三大指數中，仍以納指表現較差，科技龍頭之一嘅Tesla一浪低於一浪，目前仍繼續向下尋底。至於標指仍守喺3900支持位之上，之前由10月低位反彈，一直係炒息口轉勢嘅概念，明晚聯儲局將會披露11月議息紀錄，即管睇睇份紀錄係咪議息當日嘅會後聲明咁偏鴿。不過無論鮑爺跟其他聯儲局官員口吻仍偏鷹，主要係唔想美股市場過熱。

聯儲局雖已一再強調息口未見頂，但事實上通脹似乎已受控，而美債息亦見回落，同時歐洲嗰邊嘅息率亦見出現橫向走勢。隔晚油價喺OPEC表示增產後回落，雖然尾市跌幅收窄，但盤中一度跌逾6%。油價能夠保持喺90美元之下，確係能幫到手，通脹壓力亦能減少。除咗美債息已見回落之外，美匯指數於105水平徘徊，一旦跌穿此水平，強美元不再，新興市場唔再鬧美元荒，亦利好各地股市。雖然早前本地銀行結餘已跌破1000億港元，但近日港匯回復強勢，回升至7.8水平，即使唔代表資金從新流入，但至少反映資金停止流出。

除咗港元轉強，人民幣亦守位7.2水平回升，外資似乎停咗手狂掟A股，亦見唔少外資開始發表對A股睇法正面嘅報告，11月初至今已見外資錄得淨流入愈600億元，遠超過10月份錄得淨流出300億元。不過上月資金抄底後，近日A股兩市成交開始回落至1萬億之下，入市資金減少，加上內地疫情反覆，A股開始整固，若然內地未能控制疫倩逐步放鬆防疫措施，將會係阻礙A股回升嘅一大阻礙。

至於港股開始回調，總之仍能守住10日線及20日線，港股由上月低位反彈組織嘅上升攻勢未有破壞，港股後市仍有條件挑戰100日線。留意成交開始縮水，反映空軍回補淡倉力度減弱，兼且現水平資金入市變得審慎，再加上世界杯效應，若然成交未能保持1200億元之上，港股隨時有轉向回復弱勢之可能。