世界盃2022｜專欄：東洋武士有個X Factor

今晚德國對日本，係艾爾今屆世界盃其中一個幾期待嘅對碰。德國上屆唔知係咪中咗衞冕冠軍嘅「魔咒」，竟然喺分組賽排包尾出局，之後喺歐洲賽嘅成績都麻麻。功勳領隊路維十五年嘅執教要畫上句號，並且由費歷克接棒。

費歷克喺德國隊執教嘅頭八場賽事全勝，但對手實力比較弱。今屆德國喺歐國聯面對意大利、英格蘭同匈牙利，只能夠攞到一勝四和一負嘅成績，表現不似預期。上場熱身賽對安曼更只能小勝一球，令艾爾覺得依家嘅德國仍未有番昔日嘅霸氣。

「東洋武士」日本隊上屆喺十六強對比利時一度領先兩球，但最後倒輸三球，實在可惜。今屆球隊由森保一領軍，「一哥」嘅保守風格令唔少日本隊球迷幾唔滿意，今次更抽到同西班牙、德國同組，難免會令人擔心出唔出到綫。

不過，單講日本隊陣容，艾爾覺得唔能夠睇小。二十六人大軍名單當中，有十九位係外流球員。南野拓實、久保建英、鎌田大地有晒充足證明，今季踢緊白禮頓嘅三笘薰更係眼前一亮。呢位前川崎前鋒球員踢閘位、中場同翼位都得，變速力相當強，射術亦唔錯，可以話係今屆日本隊嘅X Factor！艾爾比較擔心嘅係日本後防級數一般，門將川島永嗣又走緊下坡，防綫上較為不足。

日本球員身體質素無歐洲隊咁強，但個人技術同整體性唔弱，球員紀律性強，前綫球員又具備一定速度，都啱「一哥」嘅反擊戰術。今場預期日本會係比較被動嘅一方，但德國破密集嘅能力一般，未必踢得好輕鬆。今場艾爾推介日本讓球「+1」下盤，9.5角球大亦可留意。 艾爾

立即下載 | 全新《星島頭條》APP : https://bit.ly/3yLrgYZ