古天后日誌｜港股結算前淡靜無方向

11月25日，大致多雲，有一兩陣驟雨，跟住嚟緊時間天氣會明顯轉涼，各位女士置咗新冬裝，可以準備登場。隔晚美股假期休市，今晚亦只有半日市，市場等待周末出嘅Black Friday銷售數據，預期銷售數字唔會有太大驚喜。由於零售市道不景氣，高盛調查估計超過四成消費者，打算減少Black Friday當日支出。而唔少零售商已提早於10月初已推出捉銷活動，據零售協會估計，今年假日購物消費總支出，可能只會有低單位數增長，遠低於去年嘅8.6%及2020年嘅32%高增長。由於市場都已預估呢次嘅零售銷售數據唔會好強勁，加上美股只有半日市，美股今晚估計偏向淡靜。

至於港股仍然係一場悶局，恒指由上月低位14600水平，反彈至18400水平，不足一個月已回彈超過兩成或3800點，目前喺10日線(17800)附近上落，下周二期指結算，大戶開始積極轉倉，估計轉倉期間壓係喺17500水平附近，只要大市仍守17000點，及50日線(16991)未有失守，而20日線(16920)已接近升穿50日線，出現第二個黃金交叉，後市仍有條件挑戰100日線(18500)左右，甚至進一步挑戰19000水平。

值得留意係大市已連續兩日成交縮減至1000億以下，反映現水平資金唔多願入場買貨，但由於世界杯正舉行，傳統呢段時間都係例靜，所以成交縮減亦情有可原。下周二期指結算，呢兩日大市波幅逐步收窄，睇嚟喺結算前，港股都唔會有乜睇頭。不過，留意期指結算日之前，指數壓住轉倉，反而下月再升機會較大，只要大市守得住50日線，古天后對後市再彈仍有信心。至於個別板塊方面，睇好後市當然係吼啲重磅指數股，港交所(00388)、騰訊(00700)及京東(09618)等優先考慮，QQ能否帶領大市下月再挑戰18000至19000水平，要多加留意美國債息走勢，一旦債息回升，對科技股呢類股份至為不利，但目前喺息口跟通脹雙雙見頂下，呢方面又唔需要太擔心