獨家丨岑珈其期待同囝囝去張保仔洞探險　聲演《奇異大世界》圓三代同堂歷險夢

岑珈其最近為動畫電影《奇異大世界》聲演孫仔「艾文」（Ethan），第三度為動畫電影配音的他，開心為囝囝臻臻儲多套作品。而今次聲演機會跟《緣路山旮旯》導演黃浩然有關外，仲要多得自己有把好有特色的沙沙哋聲音。講到戲中跟爺爺和爸爸一齊歷險，亦完成珈其現實中永遠無法完成的心願，未來他希望等囝囝長大，一齊去張保仔洞探險。採訪：杜杜 髮型：Nick 化妝： Carmen 場地：香港喜來登酒店

珈其開心再有配音機會，將來囝囝又有多套戲睇啦！

珈其瘋狂想為動畫配音，完全為了囝囝臻臻，「想等阿仔大多少少，佢識睇動畫時，我出去做嘢就係咁播畀佢睇，咁就開心啦！我又冇可能唔做嘢，如果有時出去做嘢陪唔到佢時，最好陪伴就係我配嗰啲卡通片啦！」

 

電影《奇異大世界》講三代同堂去歷險，去到一個奇幻角度。

 

 

珈其覺得跟「艾文」最相似，就是對世界都是充滿好奇。

感激黃浩然導演介紹

之前兩次配音，珈其都是配角身份，今次有聲演主角機會，他首先要多謝導演黃浩然，「我同佢嘅緣份係《緣路山旯旮》，我哋經歷謝票，成日對住佢，有次講開我話好想幫動畫配多啲畀阿仔聽，呢次工作機會係佢介紹我，佢話『識得個朋友嚟緊籌備緊套動畫，搵緊配音員，你想唔想去casting』，於是我去咗cast。」

講到不停有配音機會，原來同珈其一把有特色的沙沙哋聲音有關，「我開頭直情好奇，竟然搵我配音，唔介意我把聲唔好聽喎！今次好感謝製作單位，佢哋話黑人小朋友其實係有啲啲沙沙哋，佢哋搵配音員時都搵咗好耐，覺得我把聲有啲獨特，佢哋好鍾意就搵我合作。」

珈其獲聲演孫仔「艾文」機會，原來靠一把沙沙哋的聲。

遺憾爺爺公公早離世

電影講三代同堂一齊歷險，珈其認為這次聲演機會令他圓夢，原來他未出世爺爺已離開人世，所以他永遠沒法感受三代人一齊經歷的感受，「我阿爸嗰邊爺爺嫲嫲都好早走咗，公公都走咗得返婆婆，今次配音都算係經歷過。」幸好他同爸爸有去過旅行，更是人生第一次搭飛機令他很難忘，「嗰時我讀緊小學，咁啱台灣雙十節好平，爸爸媽媽都係第一次搭飛機去旅行，佢哋驚搞唔掂咁多小朋友，於是將啲阿哥家姐留晒喺香港，好記得印象係好開心，阿哥家姐投訴下次就全家一齊去，呢個係同爸爸去旅行嘅回憶，最後一次我同爸爸去旅行就係去韓國，好可惜之後爸爸走咗冇得再去。」

珈其慶幸跟岑爸爸都有一齊去過旅行，留下不少美好回憶。

現在為了跟囝囝和岑媽媽留下更多珍貴回憶，珈其會經常帶着他們周圍去，「我經歷咗爸爸走咗就會明，人真係好化學，可以話走就走，啲人成日話下次，可能下次就冇，會好珍惜，你以為可以陪佢耐啲咩？但人生嘅嘢話冇就冇。」他更期待等臻臻長大時，兩父子一齊去歷險，「如果同佢一齊露營、行山，應該會好開心，就算近近哋同佢去長洲張保仔洞都好，呢個係好好嘅體驗，我細個去張保仔洞真係有探險感覺，行唔行到㗎？會唔會冇盡頭㗎？都幾刺激㗎！」

珈其早前去馬來西亞工作，亦有帶埋媽咪、太太個囝囝。

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ