世界盃2022｜專家分析:肯變，總好過一成不變
2022-12-15 15:09 
執筆之時，阿根廷已經淘汰克羅地亞。阿根廷全場攻勢非常到肉，十射七中，相反克羅地亞十二射只有三中，而且三次都全無威脅。簡單啲講，「格仔兵」毫無反擊之力，阿根廷值得呢場勝仗。
當然美斯功勞非常大，可以一個人喺邊路扭過幾個對方守衞，再沿住底綫交出精準傳中，俾祖利安艾華利斯射入第三球，證明球王寶刀未老，完全唔似三十五歲。美斯今屆已經入咗五球，並且交出三個助攻，見到佢為咗今屆世界盃拼到盡，隊友亦非常落力，紛紛用好表現回應美斯嘅付出。艾爾本身唔係阿根廷嘅粉絲，都睇得熱血沸騰。
不過，艾爾覺得阿根廷教練史卡朗尼都有功勞，佢喺晉級嘅過程中，逐步搵到取勝嘅竅門。自從第一場輸畀沙特阿拉伯之後，史卡朗尼將中前場大執位，棄用柏利迪斯、迪馬利亞等表現唔突出嘅球員，並重用阿歷斯麥亞里士打、安素費蘭迪斯、祖利安艾華利斯等新人，全隊變得有活力，攻勢做得流暢好多。
另外，史卡朗尼會因應場上形勢，陣式由四後衞轉為三中堅，加強球隊防守，並且嘗試發揮前綫速度，以反擊製造入球機會。呢隊由史卡朗尼帶領嘅阿根廷，無論陣容人選定臨場調動，都比上屆進步唔少。肯改變，總好過一成不變，而呢啲微細嘅變化，正係帶領阿根廷殺入決賽嘅關鍵。
如果贏埋決賽，美斯就可以捧起大力神盃，填補多年留低嘅遺憾。各位將焦點放喺美斯最後探戈嘅同時，都唔好忽視史卡朗尼場外嘅努力。 -艾爾
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
關鍵字
最新回應