世界盃2022｜專家分析:摩洛哥季軍戰「大」波「格」
2022-12-17 08:45 
繼分組賽後，克羅地亞同摩洛哥將會喺今晚嘅季軍戰中再度碰頭。兩隊今屆表現令人眼前一亮，尤其摩洛哥係歷屆踢到最佳成績嘅非洲球隊，相信呢場會幾精采。
克羅地亞上場開壞咗個頭，到下半場初段不斷換入球員加強攻力。不過，「格仔兵」五十分鐘換入比較高大嘅般奴柏高域，同卡拉馬歷打「雙塔」戰術，但之後嗰啲無乜邊路嘅傳中波，完全發揮唔到兩位球員嘅制空能力。輸到第三球之後，克羅地亞有幾次死球攻勢，後衞洛夫雲嘅入楔有好大威脅。艾爾講過阿根廷嘅制空力較弱，領隊達歷雖然喺半場時已經撳掣，但打法上似乎未有針對對方嘅弱點，變相「只係攻，得個空」。
摩洛哥上場對衞冕冠軍嘅法國表現絕對唔錯，唔係死守到底，下半場射門達九次，比法國多超過一倍。奈何前綫入波「只差一點點」，後防球員連續兩次集體被基利安麥巴比「玩弄」，最後只能睇住法國慶祝入決賽。事實上，中場蘇夫恩岩拉伯特嘅出色表現，更獲得法國總統馬克龍大讚。「亞特拉斯雄獅」拚死一戰嘅精神，已經令在場多位粉絲動容，季軍戰相信會更加落力。
睇返自二戰後舉辦嘅十八屆世界盃季軍戰，只有四屆總入球少過三球，包括上屆比利時兩球淨勝英格蘭。雖然克羅地亞同摩洛哥今屆首次對碰悶和零比零，但季軍戰相信無咩保留。
摩洛哥上場好早階段換走安尼斯利、保法爾等進攻主力，克羅地亞大部分球員亦無乜出過力，兩隊今場可能上演入球騷，全場入球大細「2.5」大可以考慮，另可博安尼斯利「入球」嘅首發事項。 -艾爾
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
關鍵字
最新回應