古天后日誌｜長假將至無心戀戰待1月再作定奪

12月20日，日間部份時間有陽光，天氣乾燥，氣溫略為回升。隔晚美股繼續疲軟，三大指數再跌，道指跌162點，標指跟納指分別跌34點及159點。標指失守3900重要支持，暫時已失守兩日未見反彈。美股喺11月份嘅反彈，已反映加息步伐放緩，甚至明年減息預期，經過一輪反彈，嚟到現水平，已難再吸引資金追貨，尤其臨近年結，基金已收爐，待明年1月再作配置，美股難望短期再大升，能重返支持位已算唔錯，即管睇睇呢兩日，美股如何發展。

目前市場對息口走勢仍有分歧，即使FOMC內部也分成鷹鴿兩派，偏鴿認為目前通脹已見頂回落，若過份加息會損害經濟，所以明年息口要掉頭向下。而偏鷹一派認為美聯儲打擊通脹已係遲咗一步，依家稍為受控就放鬆，通脹一旦死灰復燃，對復甦之路將構成極大阻礙，尤其是美股已擺脫崩盤危機，鮑爺出一出口術話繼續行貨幣緊縮就無須花費分毫，但就能防止股市過熱，再度起泡。

十年息回落至3.4%，反映市場偏向樂觀，隨著標指接近4100，避險情緒開始升溫，十年債息亦反覆回升至3.60%。值得留意市場估算明年初至少會再加息0.50%至4.75%，加息至5%機率正下降。不過兩年息從4.8%下跌至4.2%，兩年息正反映2024年息口會回落4.25%。息口預期直接影響美股走勢。今年當息口預期由1.8%上升至5%時，美股就向下走，目前2023年息口預期係仲要先輕微加息後轉平穩，再睇通脹點發展，預期明年下半年或2024年初開始減息，美股亦會隨住息口變化，已逐步走強。

至於港股嚟到19000樓上，加上長假期將至嘅關係，已進入悶局，雖然大市仍然會隨住消息上落，但目前19000至19200有一定支持，只要呢個位穩守，後市仍然向好，只係長假將至，資金亦唔會積極入場，加上近日資金輪動追逐二三線股份，呢一輪升浪明顯已屆尾聲，不如提早收拾心情等放假，1月再睇基金有何部署再作定奪。