有片｜綠Van司機揸車左搖右擺險撞欄 飛站爆粗兼疑似打乘客

道路安全最重要的是駕駛意識及態度，今日（22日）網上流傳一條影片，片中小巴司機不斷踩油加速兼「扭左扭右」，幾乎撞上欄杆，令全車乘客非常擔心，恐釀成意外。有乘客開口叫司機「揸定啲」，惟司機竟毫無歉意，更以粗口「回贈」，最終雙方爆發口角。小巴駛至觀塘時更飛站，經多名乘客要求落車時才在路口位置停車，不過司機疑似出手打人，雙方爆發大混戰，最後有乘客致電小巴熱線投訴。

YouTube頻道「香港新聞突發時合集 Hong Kong Breaking News Collection」今日下午上傳一條長約2分48秒的影片，片中所見多名乘客指小巴司機揸車「好chok」，希望他可以「揸定啲」，司機竟以粗口回應：「我錯乜X嘢呀？」、「我乜X嘢呀？」，有男乘客非常激動，大喝：「乜X嘢呀而家你呀，你咁X樣揸車嘅咩？」

●點擊睇整個過程●

有乘客指司機揸車好chok，希望他可以「揸定啲」。片段截圖

小巴駛入隧道後，司機不斷爆粗，毫無悔意。片段截圖

多名乘客指司機飛站。片段截圖

司機將小巴停在路口位置讓乘客落車。片段截圖

有男乘客落車時指司機打了他一下。片段截圖

有乘客落車之後，致電小巴熱線投訴。片段截圖

畫面其後一轉，小巴當時正在隧道內行駛，有乘客指責司機大聲鬧人，「仲咁大聲？咁多證人真係」，但司機不滿乘客投訴，反駁表示：「咩唔啱啊」、「你都多X餘嘅，X你老X。」有女乘客隨即問司機為何講粗口，「咁多證人睇住你，仲咁惡？你危險駕駛啊，駛去警署啦！我做證呀！」

畫面其後再轉，當時小巴已在觀塘往新蒲崗方向行駛，其中有多名乘客指司機飛站，「有落喎阿哥」、「燈都着埋啦，司機你喺度搞乜嘢呀」、「一早撳咗鐘啦，哥仔」、「有落呀，落車呀」。司機竟指「落車，到站先落車㗎嘛」。車廂內起哄責罵聲四起，最後司機竟將車停在路口位置，要求乘客落車。不過，坐在司機後座位置的男乘客落車時突然大叫：「你做咩無端端打我呀？」、「睇住你爭啲炒去欄杆，我都唔出聲」，司機未有回應，反問：「你落乜X嘢車呀？而家到站先畀你落啦！」

有車上乘客表示，今日（22日）早上乘坐專線102號小巴由坑口往新蒲崗返工，當小巴駛入將軍澳隧道時連續數次加速「扭左扭右」，非常危險，「全車人都chok到捉實架車，有人警告司機要揸定啲，司機反鬧乘客！由於途中冇站，大家心驚驚被迫坐喺車度，到觀塘㩒咗鐘落車，但司機冇停站飛咗幾個站去到牛頭角一個路口位（非小巴站）亂停車。停車後繼續與乘客罵戰，亦有出手。」她補充有乘客落車之後，致電小巴熱線投訴，對方亦已停止該司機駕駛下一班車。

片段隨即引來網民熱議，認為車上的乘客應該報警，以儆效尤，「去警署啦唔好講咁多，反正有證人又影晒相」、「應該報警先啱，對其他乘客有保障」、「102不嬲都係好Chok，已經冇搭十幾年」。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ