古天后日誌｜港股10日線上落 假前靜局宜忍手

12月23日，天晴，天氣非常乾燥，早晚相當清涼。本周除咗日本央行宣布容許利率波幅擴闊至0.5%，變相調節貨幣政策，由極度寛鬆稍稍收緊之外，歐洲息口亦調高至3.5%，德國10年債息再創高位，加息陰影再度困擾美股，隔晚美股顯著下跌，道指更一度跌800點，尾市跌幅收窄至349點；標指跟納指則跌55點及213點。標指受制3900之前嘅移動區間底部，暫時3800點見支持，睇嚟都要睇美息點走。

市場再受加息陰影困擾，主要係美國目前經濟情況保持強勁，美國第三季GDP增長達3.2%，高過之前已修正嘅2.9%，消費支出增長達2.3%，遠高於初值1.7%，雖然加咗咁多次息，消費維持強勁，美國人大花筒性格不變，裁員潮下未見慳啲使，暫時美國經濟未見衰退。至於就業市場亦保持穩健，雖然科技企業大手裁員，但零售及餐飲業，尤其餐飲業持續人手不足，剛公佈初領失業救濟金人數為21.6萬人，遠低於預期水平27萬人，就業市場強勁，GDP好過預期，即係聯儲局仍有空間加息。呢個就係近日美股疲弱嘅主要原因。

至於港股就無乜好講，呢兩日彈返啲，保返住條10日線，其實早於上月大市展開反彈，本來反彈目標就係19500至20000點，結果本月順利達標，簡單嚟講，港股由10月低位反彈至19500至20000點水平，本月年結可以企到19000水平年結，都算收復部份失地，未至於喺低位年結，已經算唔錯。由於短線反彈幅度已超過兩成，港股後市再上，都要有更好消息，及更多資金入場配合。暫時市場炒嚟炒去都係中港通關，呢個所謂好消息都消戋得七七八八，至於入場資金喺長假期前則買少見少，喺呢段時間估計都係10日線上落，唔會有乜睇頭。而大家期待嘅年結window dressing，都提前做定咗，今年淨低幾個交易日，斷估唔會有太大變動，日升日跌窄幅上落，加上現水平值博率一般，不如忍忍手，呢幾日開開心心過聖誕，唔好手多多。