星8卦｜犯眾憎「愛姐」嫁錯「失匙夾萬」太子爺 陪契爺過夜換肉金養廢老公
2023-01-13 10:00 
娛樂圈畸型現象一向多，有時真係會令你睇到O嘴，咁都得呀？
「愛姐」出身普通，一心諗住入娛樂圈拋個身出嚟搵快錢，佢唔係孝順顧家，今時今日唔再係以前賣肉為家貧。你話愛姐屋企好窮，又唔係，做個平凡OL佢唔甘心啫，話佢貪慕虛榮比較貼題啲！參加比賽入行，被公司老闆睇中，好快就獻身即食，長期係酒店尋開心，不過，係人都知佢有條真正大水喉「燈哥」射住。
「燈哥」喺江湖有地位，雖然年紀大愛姐差唔多30年，但對愛姐情有獨鍾，司機靚車出入，仲有豪宅任住，為咗避人耳目，愛姐定時搬入燈哥靚屋住，仲高調搞埋上契儀式，但明眼人一睇就知，呢對契爺契女有唔尋常關係。大家頂愛姐唔順，咪因為燈哥太縱，又學晒契爺啲霸道行為，圈內好多人唔妥佢，搞到佢無咩嘢做，哈，你以為愛姐死梗，原來佢趁呢段時間玩結婚，搵咗個失匙夾萬太子爺埋街食井水，太子爺夠傻仔，娶個明星老婆希望老竇覺得自己有成就，結婚幾個月愛姐就好幸福咁話自己有咗，仲要三年抱兩證明兩公婆好恩愛喎。
太子爺當然繼續「失匙」，不過生活反常咁富貴，無非係愛姐同老公講，夫妻同心，做名人唔可以失禮，所以拎晒啲私己錢出嚟撐住門面，太子爺樂得成世人無所事事，由得愛姐養自己。事實係燈哥對愛姐有真感情，但屋企個老婆又唔可以拋棄，但又擔心愛姐嘅將來，於是幫佢搵埋太子爺，然後個個月俾大筆家用愛姐養家，搭一個靚棚，等愛姐人前人後夠晒面子，條件係佢唔准離婚，否則斷水斷糧。愛姐所以婚後扮無事業心，好安份咁做歸家娘，好彩太子爺除咗廢，仲有七分外貌身材，又聽話顧家。
燈哥就一個月要愛姐陪自己過一次夜，至於點呃太子爺放人就係愛姐最大嘅考題，愛姐梗係要諗方法應酬真正嘅大老細，所以最近又高調出嚟做嘢，同助手扮好忙，其實係燈哥要見佢，就要即時交人，睇吓幾時太子爺知道真相，肯唔肯繼續戴呢頂綠帽！
【相關文章】：
最新回應