古天后日誌｜北水回歸防趁高沽貨套現

1月30日，天晴，天氣乾燥，早上寒冷，早出晚歸，記得著多件衫。虎盡金來，免氣揚眉，上周港股喺兔年開市表現唔錯，恒指已進一步逼近23000關，今日內地春節假期完畢復市，北水回歸係高追，抑或趁高沽貨，古天后傾向相信後者機會較大，加上期指結算日，唔排除結算後出現調整。不過近日全球股市牛氣逼人，上周五美股持續向上，已連升六個交易日，道指再升28點，標指升10點，納指繼續追落後，周五晚再升109點。注意標指由3800水平搵到支持後回升，現已逼近4100較大阻力位，嚟到呢啲水平，唔單止再追貨值博率已低，甚至應該考慮減減磅，高沽低買係常識，即使睇好今年股市表現，都唔可以盲目樂觀，股市再升都要回調。

唔少美企已公布業績，雖然唔少美企管理層對上半年業績表現睇法較為保守，但市場情緒卻仍樂觀，即使銀行股喺第四季大幅增加撥備，銀行股績後股價先低後高，反映市場面對利淡消息，仍願意趁低吸納。留意美國車貸逾期還款比例持續向上，反映喺加息之下，更多美國債仔無能力還錢。今個星期美股有唔少消息公布，包括周四晚FOMC議息，周五將公布非農數據，失業率會否反彈，以及時薪增幅都會係市場關注嘅數字。

環球股市反彈到現水平，不明朗因素正增加，暫時股市上落受市場氣氛影響多於實際盈利能力。美企第四季盈利能力預估要倒退5%，但市場氣氛卻異常樂觀，主要係美匯指數低走，令美股受惠，尤其係新興市場。今年美國GDP估計只0.5%的低增長，反而中國喺通關後估計GDP增長可達5%以上，理論上中港股市值搏率較佳，但過去3個月港股已從低位反彈超過50%，值博率下降之際，入場炒作難度更大增。

至於內地復市又如何，有關內地春節相關數據，暫時似係旺丁唔旺財，旅遊出行人數回復至2019年嘅九成，但收入只回復同期七成；樓市更加無眼睇，過去一周30個大城市商品房成交大約係4.47萬平方米，僅及去年同期兩成。喺過去十幾年，內地靠樓價上升累積財富，由樓市產生嘅財富效應推動經濟，但舊年樓市爆煲後，等住賣樓還債嘅人，定必多過再買樓嘅人，加上內房本身積存待售嘅庫存，真係需要好長時間去消化。一旦內房股未能成功售樓套現還債，未來日子就要繼續借貸渡日，最後又係由內銀去孭起呢個擔子。內地通關後，雖然GDP增速應該跑贏美國，但內房呢條最大產業鏈，一日未能解決債務問題，仍然係一個計時炸彈，呢個亦係內地股市目前仍處於估值歷史低位附近，資金都寧願追入估值較高嘅美股，未肯全情投入內地股市嘅主要原因。