魚頭允與「第一代郭靖」白彪屬親兄弟 感謝阿哥帶入行：試過一日賺超過十萬
2023-01-31 14:05 
人稱「魚頭允」的資深演員兼龍虎武師的劉允，入行50年曾經演出過不少電影，雖然大多數只屬配角之演出，但因為有一對鬥雞眼而令人留有深刻印象，直到2019年，劉允在第38屆電影金像獎獲頒「專業精神獎」，當晚才得知他是「第一代郭靖」白彪的親弟，當年更加是白彪介紹弟弟入行做龍虎武師，高峰期「試過一日賺超過十萬」！
【點擊睇白彪魚頭允精采演出】：
魚頭允家中有十二名兄弟姊妹，白彪排行第八，劉允則排行第九，他之所以有鬥雞眼，事源於他在一歲時患上腦膜炎，以致高燒抽搐得來。早前魚頭允和白彪齊齊接受好友楊紹鴻為港台主持的節目訪問，原來當年白彪帶弟弟入行做武師，「武師呢行都好搵，搵到食，60年代，搵70蚊一日，已經好多錢。未入行前，我哋兩兄弟喺織布廠做毛衫，搵2、30蚊一日已經好威，我入咗電影行，我叫阿允唔好做織機，跟我入行。」
其後魚頭允由武師跳出幕前，他笑說：「當時有個導演要搵3個對眼都唔同嘅演員，搵咗『大細眼』（宋錦成）、『射籬杜』（杜少明），搵埋我『魚頭允』，但仲爭一個，於是搵咗個劇務『射籬深』，我哋4個喺七聖廟一間舖仔拍一場打麻雀嘅戲，有個阿婆一睇就笑，『呢4個人咁得意嘅，打麻雀都唔係望住麻雀枱嘅，你眼望我眼，我眼望你眼。』係咁笑，導演咪覺得得意囉。」結果因為電影大賣，於是繼續拍多部：「我同杜少明又拍，射吓射吓！又賣座喎，嗰陣時唔係收好多，1000蚊一日，製片問我片酬收幾多，我話2500蚊一日，拍吓拍吓又hit喎，諗諗吓，我再升到5000蚊一日。」魚頭允笑言當時日日有工開，一日拍兩組，一日賺一萬蚊：「試過一日賺得最多，係超過十萬，開工冇得返屋企，咪塞入褲管，搞到隻腫晒，劇組啲人以為我整親，叫我去睇醫生。」到了1990年，因沒有喜劇再拍，魚頭允返回幕後工作！
提到魚頭允在2019年獲得金像獎的「專業精神獎」，白彪大讚弟弟：「佢就威喇，不過佢人緣好，乜都肯做，導演話乜，佢就做乜，佢嘅工作精神又好，人緣又好，所以呢個獎佢攞係ok嘅！我嗰個就係撞彩」劉允笑稱自己都不明白為何有獎，但獲得同行認同及肯定而感到很開心，當然亦很感謝哥哥帶他入行。
【其他閱讀】：
45歲連登女神楊卓娜失眠跌Watt現老態？網民嚇窒驚嘆似64歲楊盼盼
自然系女子旅行丨32D仙氣女神著豹紋三點式浸浴畫面香艷 戶外著bra top玩騎馬仔好「動感」
「奀妹」傅天穎再成熱話！離婚後曾自殺被爆公園打野戰 遭友人騙過百萬後於按摩店搵食
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應