古天后日誌｜港股進入調整期 至少回補1月初上升裂口

2月7日，大致多雲，部份地區能見度頗低，日間短暫時間有陽光，早晚有一兩陣微雨。本來美國市場仍歡天喜地以為聯儲局好快可以由緊縮貨幣政策，轉換至寛鬆貨幣政策，但上周嘅就業數據反映，喺通脹雖見頂但未有顯著回落下，仍需要繼續緊縮政策，加息周期或較原先預期較長。另一方面，周末期指美國擊落中國嘅偵察飛船汽球，令中美地綠政治風險升溫，拖累美股表現。

美股三大指數下跌，道指跌34點，但收市跌幅已較盤中收窄；標指跌25點，報收4111點，仍守喺4100水平之上，納指則跌119點，報收11887。美股業績期繼續，繼續有大型企業派成績表，噚晚輪到微軟公布業績，雖然收市微跌0.6%，但盤後倒升0.4%。外媒報道，公司將喺周二舉行ChatGPT特別活動，預期將展示其人工智能聊天機器人ChatGPT和搜索引擎必應融合，活動邀請函已於上周發出，與會者被告知，CEO將透露「幾個令人興奮的項目進展」。睇嚟AI同ChatGPT會係今年一個主要嘅炒作概念主題。

較早前市場押注聯儲局加息周期進入尾聲，市場風險胃納上，資金有過度流入公司債市，過去一周，美國公司債市場發行了超180億美元新債，投資者認購規模達到發行量五倍，反映部分投資者一廂情願認為美國利率可能見頂，固定收益投資基金經理開始重新入場搶購債券。不過，上周五嘅就業數據公布後，情況似乎有所逆轉，加上部份美企公布業績後，對企業展望較為悲觀，投資者即爭相減持股份，若然市場態度真係嚟個大逆轉，股債齊沽嘅話，唔排除美股或進入新一輪跌浪。

至於港股上周失守10日線後，再失20日線，暫時走勢已明顯轉弱，雖然暫時守住21000水平，但短線未能收復20日線嘅話，回補1月初嘅上升裂口20800-20900嘅機會大增。雖然中線港股仍有上升空間，但本輪調整回補20800上升裂口，再進一步下試50及250日線水平，回落至20200點，亦可順理成章營造大型頭肩底嘅右肩部份。即係睇好港股中線表現，要入場買貨都唔使急，等恒指落去回補20800點回補上升裂口，甚至考驗50及250日線先出手買貨，會係一個較好嘅切入點，不妨耐心等候。大市至少要修復20日線，即21700水平並企穩，先有機會完成調整，重新上路。