金像美指文念中操刀 拍攝《廿四味》Brian𥄫女𤓓史賀情人節

今日情人節，金像獎美術指導文念中導演與《廿四味》Sir JBS (Brian Siswojo) 和 Brian的太太 Annie 再次一齊創作情人節短片《鵝愛你》，繼去年的《さようなら私の愛》，今年就以 iPhone 14 Pro Max 拍攝1分鐘搞笑真人真事短片，提醒各位人兄愛好美好事物之餘，亦要好好愛惜生命，𥄫嘢要小心。

文念中去年以 iPhone 13 Pro Max 的電影模式 （Cinematic Mode） 拍攝微電影作品－《さよなら私の愛》（Sayonara Watashi No Ai） 。

4分鐘作品以黑白畫風呈現，搞笑演繹一對曖昧男女的一場密會。

片中講述Brian同太太Annie及囡囡Tayla Siswojo身處一架車，由於Brian架車泊喺燒臘檔隔離，坐於司機位的Brian望住燒鵝望到流晒口水，但同時有名長髮女子在檔口前扭身扭勢，Brian老婆見到老公個流口水樣即詐型，連個女都好唔高興，當然件事唔係咁簡單。

兩公婆坐喺車，老婆拎住花本來開心。

Brian望住燒臘檔。

望到流晒口水。

又真係幾吸引嘅。

鏡頭見到一名長髮女子扭身扭勢。

老婆見到即兜巴星Brian。

睇嚟好大力。

鏡頭一轉，男人嚟嘅喂。

隔住張相都聞到香味。

老婆食得幾滋味。

兩母女食到笑晒。

Brian做足表情。

問文導演有關拍攝過程，他表示非常順利，一Take過搞掂，至於在片中客席出鏡飾演長髮女，他說是Brian要求，「佢哋叫我試，我唔Sure，疑惑得唔得㗎?佢哋猛話得。」至於點解會有呢個構思?全是Brian的親身經歷，仲要發生喺10年前，「因為Annie喺情人節前突然記起，提議拍低佢等大家開心吓。」段片過癮但最得意係片中Annie及14歲囡囡Tayla Siswojo開心食燒餓髀，原來兩母女第一次咁樣拎住隻髀嚟食。導演笑說，「拍嗰陣買咗隻燒鵝髀做Props，佢哋咬完兩啖話好好食，食到好乾淨，原來佢哋未試過成隻髀咁食，覺得好好食。」

文念中及Brian夫婦。

《星島頭條》APP經已推出最新版本，請立即更新，瀏覽更精彩內容：http://www.stheadline.com/