古天后日誌｜銀行危機暫緩解 港股反彈至20及250日線阻力大

3月22日，日間短暫時間有陽光，間中有一兩陣驟雨，天氣和暖。隔晚美股喺聯儲局議息前全面做好，有消息指美國政府或可能向所有傳款作出擔保，銀行股反彈，道指升316點；標指重上4000水平，升51點；納指則升184點。標指守咗3800-3900支持反彈，阻力位將會係4100-4200左右，後市都要視乎議息結果，今晚聯儲局議息，以目前嘅情況，市場已預期息口見頂，經過今次嘅銀行業危機，加息0.5%已經無乜可能，惟通脹高企下，加息0.25%係超過八成市場預測嘅情況，至於維持息率不變唔加息亦非無可能，就算今晚FOMC議息結果如何。

美國政府有意擔保所有存款，確有助挽回市場信心，但小心淡友又出嚟搞搞陣，以FRC為例，隔晚股價早段曾反彈逾六成，但高位有見空軍來襲，收市升幅削半，至盤後股價繼續受壓，睇嚟空軍暫時未肯收手。空軍嘅玩法就係大手沽空銀行股，逐隻擊破，令銀行業動盪不安，摧毁市場信心，令存戶擠提。銀行存款被大量提走，股價大跌，逼令銀行賤價賣資產，政府出手。其實空軍嘅所作所為，其實明顯易見，依家政府出手保存款，雖然可挽回市場信心，但未能阻止空軍嘅沽空行為，試想一下，既然存款已得到保障，即係再有銀行擠提都有政府包底，喺風雨飄搖嘅情況下，只要稍有風吹草動，再有銀行傳出流動性不足，自然會再次引發擠提，咁即係銀行股股價又再插水，空軍不斷沽空不同銀行股，輕而易舉地喺市場搵食，沒完沒了。

要擊退空軍，非常時期利用非常手段，簡單直接以行政指令，喺呢段時間禁止任何銀行股嘅沽空，呢個做法喺2008年金融海嘯發生時已做過一次，當時美股插手，市場崩跌，國會緊急通過裸空，即係唔可以無貨喺手而沽空，其實依家同樣可以用呢個做法去阻止空軍搵食，無奈美國政府仍有政治因素要考慮，加上唔想畀人指控過份干預市場，所以未有採取相關行動。

不過暫時環球銀行危機叫做有所緩解，市場反彈亦屬正常，港股有望先修復10日及100日線，大約係19400-19500水平，至於20跟250日線嘅匯聚區19800-19900阻力唔細，睇怕就無咁容易修復，若然有貨喺手，睇睇呢啲位要唔要減磅，目前都係輕倉上路較佳。加上踏入業績期，唔排除業績一出，唔少股份可能又係見光死。