古天后日誌｜銀行危機有望解決 市場焦點重返息口走勢

3月28日，多雲，間中有幾陣雨，早晚天氣清涼。隔晚美股仍反覆，不過SVB跟Signature Bank成功拆骨出售，而且售價亦未至於太賤價，銀行業務都仲係值返啲錢，帶動銀行股反彈，道指最終升194點，標指則升6點，暫時守穩3900水平。不過銀行危機略為退減，債息有所回升，科技股又面臨壓力，納指則倒跌55點收市。

FDIC宣布以165億美元收購SVB價值720億元貸款業務，尚中包括SVB借畀客戶嘅貸款，以及560億美元負債，亦即SVB嘅戶客存款，即係FDIC係有可能面對560億存款被提走問題，不過FDIC已承諾擔保銀行有足夠流動性。至於貸款部份為720億美元，客戶若按時悉數清還，減去560億美元負債，即FDIC所收購嘅業務淨資產值為160億美元，FDIC以165億美元收購，其實等於無折讓，反映SVB手上資產其實係有價有市。SVB成功出售業務後，聯儲局即表示SVB爆鑊只係中小型銀行一個管理不善嘅個別例子，並非整體流動性出現任何問題，並表示日後將加強對中小型銀行嘅壓力則試。

銀行股回穩，債息略為回升，市場焦點又重回5月議息預測，目前市場係認為銀行危機可解決，至5月議息目標仍然係打擊通脹，所以5月加息0.25%就變得合理。不過債息向上係利淡科技股，暫時美股係個別板塊輪流炒，並非全面向上。

至於港股上周曾作技術性反彈，一度升抵20000水平，可惜未見成交配合，20000水平未能企穩，而公布咗業績嘅股份，表現不一，騰訊(00700)業績平平，績後反而大挾淡倉，相反美團(03690)業績唔係太差，但上周喺ADR仆直，噚日單日急跌6%，話就話因為騰訊派出美團惹嚟沽壓，但好老實，基金大戶要沽貨都唔會等到今時今日，至於老散又會有幾多貨沽，講到底都係大戶搵藉口做嘢，話唔定之前已高位沽咗貨，求其用個藉口質低股價，慢慢平淡倉，可憐手上有貨嘅小股東，又唔知等到幾時見家鄉。因為美團業績而買貨，出到嚟結果事與願違，仲要一買即中伏，呢啲咁嘅市場，仲有乜嘢投資者肯同你玩落去，呢個亦係港股愈玩愈縮，成交愈見淡靜嘅原因。