古天后日誌｜港股料隨美股高開 若成交未配合或繼續反覆

4月11日，多雲，早上沿岸有薄霧，日間短暫時間有陽光。美國上周五就業數據表現強勁，5月加息機會增加，不過隔晚美股反而低開高走，似乎市場已接受5月需要再加息。道指升101點；標指微升4點，納指則從低位反彈，全日跌幅收窄至3點。

美國3月份新增職位只有23.6萬個，增幅已呈下降趨勢，資薪同比上升4.3%，增幅是過去20個月最少，反映企業開始放緩擴張趨勢。不過失業率不升反降至3.5%，勞動力市場仍然相當緊張。就業市場未見嚴重衰退，美聯儲大條道理可以喺5月繼續加息0.25%，美股隔晚因而全面低開，不過實體經濟未至太差，市場估計第一季度標指ESP倒退7%，目前係預估上半年倒退，下半年回升，全年標指股份平均EPS仍有望錄得升幅，結果係令美股逢低就有買盤吸納，令周一美股低開高走，道指跟標指跟倒升收市。

銀行危機已漸減退，上周銀行向美聯儲局貸款資金缺口，已兩續兩星期下降，擠提風潮過去，經過一個月補充手上現金，暫時銀行可以話已渡過危險期。中小型銀行開始回復正常運作，同業拆借慢慢回復正常，銀行股受消息刺激低開高走，亦係隔晚推升美股回升嘅動力之一。

至於港股呢邊，估計今日會高開，不過能否高開高走仍係問題，港股最大問題係缺水，金管局又接多38億港元沽盤，反映資金係流出而非流入。再睇返3月份港股曾回試19000水平，但未見成交增加，即係落到低位都未見資金肯入場，日均成交都唔過1200億元，雖然月底結算抽高至20700水平，但成交額亦不過1400億元左右，講嚟講去都係未能打破悶局。港股係偶見由高成交略增，似係挾淡倉嘅冚倉盤多於資金高追入貨，挾倉過後，成交又回復平淡，一注資金塘水滾塘魚，基本上港股只係炒上落。即使坊間有唔少人認為恒指已升回多條移動平均線之上，可以向好回升至21000，甚至23000水平，但從資金流向睇，大戶喺19000水平未見積極買貨，唔通會咁好死，去到21000樓上同你追貨?