古天后日誌｜內地拉動投資困難 慎防陷入通縮困局

4月12日，大致天晴，日間天氣炎熱。隔晚美股表現牛皮，市場靜候今晚公布CPI數據，道指升98點，標指無變動，納指升跌52點。標指升至4100點阻力，目前需要整固，就業市場表現仍然強勁，令聯儲局大條道理繼續加息，至於加息幅度如何，以及其後息口路徑點走，今晚嘅CPI將成焦點。核心CPI上月為5.5%，目前市場預估今次核心CPI大約係5.6%，若然公布係5.6%或以上，反映自上年第四季回落嘅CPI勢頭又有所逆轉。

除咗CPI之外，另一項經濟表現嘅重要指標為PPI，PPI反映工廠生產成本，呢一類成本變化大約有三個月滯後，升跌要喺3個月後先從市場價格反映，所以CPI回升未必等於通脹重臨，要睇埋PPI有否同時向上。目前無論美國或中國嘅PPI仍然係向下趨勢，短期內未見出廠價格有好大回升壓力。既然通脹未見回復上升之勢，即便聯儲局下月仍要加息，幅度亦唔會太凶狠，而經過較早刪嘅銀行風暴後，市場更關注係銀行收緊信貸，或阻礙經濟擴張，嚴重可令經濟陷入衰退，呢個正正係市場博聯儲局最快或於今年第四季減息，亦係美股逢低便見買盤吸納嘅原因。

美國通脹似乎已受控，就業市場表現亦穩健，暫時美國經濟陷入衰退機會唔大，呢個係古天后一直對美股較有信心嘅原因，亦強調美股可以逢回調吸納；相反，對於中港股市，古天后信心則一般。主要係內地喺過去三年疫情，唔少商業活動，因為嚴厲嘅防疫封城政策已大受打擊，唔少就業職位亦因此消失，要重振經濟談何容易。尤其喺民眾防患意識提升下，要促進投資及消費甚有難度，如果話美國經濟有可能陷入衰退，中國陷入通縮機會更大。

市場原預計，隨着內地重啟經濟，市場需求復甦帶動下，通脹會回升，甚至會帶動全球通脹升溫。不過，繼2月內地通脹低於預期，剛公布的3月通脹數據仍然低企，反映內地市場需求恢復情況未符預期，未能帶動物價喺預期軌道回升。若然未能扭轉呢個趨勢，內地通縮壓力不容忽視。

事實上，通縮對經濟威脅不下於通脹。當資產價格下跌預期一旦確立，非但不利內部需求與民間投資，亦難以吸引外來資金流入，結果只會陷入惡性循環，內地當務之急係設法刺激需求，改變預期。要締造有利投資氛圍，除咗財政、貨幣與產業政策刺激之外，國際地緣政治穩定相當重要。無奈近日台海局勢及中美關係緊張，增加不確定性，居民與企業憂患意識加強下，要刺激消費與投資恐怕難上加難。呢個亦係古天后認為中港兩地股市短期之內，都係只有波幅，難有升幅嘅原因。