獨家丨岑珈其感激恆仔念舊乜都預佢 口水佬拍《和解》要封嘴超難頂

岑珈其在ViuTV劇《和解在後》飾內歛兼乜都冇意見的調解員「鍾信立」，由於他出名口水多過茶，所以好大挑戰，而最開心跟識於微時的好兄弟趙善恆再合作。講到年初轉公司，珈其坦認不想再耽誤前經理人麥曦茵的創作路，期待同好兄弟劉俊謙和朱栢康拍住上。採訪：杜杜 服裝:Original80s、Levi’s、Dr.martens

珈其出名多口又多意見，現實要他做調解員完全冇可能。

向來有話直說唔停口的珈其，演「鍾信立」最大挑戰是「忍口」，「我覺得好玩但忍得好辛苦，每次cut機都會即刻跳返出個角色，因為真係冇可能冇諗法，點會唔講自己感受，但調解員就係要冇立場冇意見。」他自問冇可能做到真正調解員，「佢哋都話我多嘢講到好煩，人哋未講完我應該會搶住講自己諗法，哈哈！」

珈其跟「鍾信立」性格反差極大，對他好大挑戰。

《和解》中，珈其跟李敏的一段情，寫得好有趣。

簽新公司唔想耽誤麥曦茵

珈其早在男團PlayTime年代，因邀恆仔寫歌而認識，之後再一齊到馬來西亞拍電影一見如故成為好兄弟，所以有機會恆仔都會搵他合作，「《一秒拳王》佢都有搵我，今次第一個劇又預我，真係好感謝佢，有咩可以一齊玩都一定會預埋我。」不過恆仔有樣嘢令珈其好不滿，「每次講我都好嬲，就係我太太好鍾意佢，我梗係唔開心，哈哈！我太太中學時已經聽ToNick嘅歌，係粉絲，佢哋演唱會我都會陪太太去睇，多謝恆仔知我太太鍾意都會預啲靚位。」

珈其跟恆仔識於微時，開心有份參與對方首部電視劇作品。

2016年珈其跟恆仔和黃溢濠出發去馬來西亞拍戲，飛機上已傾唔停。

珈其雖然跟恆仔是好兄弟，一樣因太太好鍾意對方而呷醋。

珈其年初轉投新經理人公司，他解釋跟前經理人麥曦茵感情不變，依然視對方如家人，「大家回顧返呢10年，又傾將來點行落去，發覺我哋遺忘咗阿曦係導演同編劇，佢太用心照顧我哋冇時間做，都有少少內疚，不如轉個新環境。好感恩遇到阿曦，佢畀我家人嘅感覺。」而珈其亦感激《緣路山旮旯》導演黃浩然介紹新經理人，開心跟劉俊謙和朱栢康做同事，「結婚時佢哋有做我兄弟，好難得大家同公司，好期待同新公司合作，想試吓衝出香港，擴闊圈子接觸多啲唔同嘅作品，跟多啲勁人學嘢。」

珈其感激伯樂麥曦茵一直照顧，轉公司有種下山闖蕩江湖感覺。

珈其跟新同事劉俊謙、蔡思韵和朱栢康都熟絡，更易溝通。

 

新網站 www.stheadline.com 已推出