古天后日誌｜金管局連番接港元沽盤 港股缺資金流入欠動力

4月13日，大致多雲，日間短暫時間有陽光，初時局部地區能見度較低。隔晚美國公布CPI低過預期，美股早段全面高開，不過聯儲局又有官員走出嚟放鷹，加上股神巴菲特指銀行風暴尚未完結，美股其後由升轉跌，道指跌38點；標指跌16點；納指則跌102點。標指仍無法突破4100阻力，炒減息預期暫告一段落，喺未有其他更好消息下，美股未能進一步向上突破。美股稍後又到季績公布，市場正等待更有值博率嘅水平先願意出手。周五晚先有銀行股公布業績，睇睇屆時市場反應如何。

股神巴菲特認為銀行風暴仍未過去，指將有更多銀行面臨倒閉，原因係存戶雖受到FDIC保障，但FDIC亦唔係代表由政府去承擔風險，而係由其他銀行繳付保費去承受，即係話再有類似SVB事件發生，虧損係由其他銀行埋單，所以佢暫時唔會投資銀行股。股神此話一出，銀行股隔晚全線向下。

除咗銀行股腳軟，中概股亦明顯走弱，出現洗倉式下跌，富途、拼多多、阿里、嗶哩嗶哩跟京東，全部跌5%或以上。而阿里主要股東之一嘅軟銀，表示已完全沽售10%嘅股份，已正計劃再沽出手上餘下一成阿里股份，阿里股價應聲而下。之前阿里跟京東先後公布重組，並計劃分拆業務上市，巴巴一度重返紅底股，可惜紅底股身份未能守住，講完一大輸，分拆連樓梯都未聽到聲，呢頭軟銀就又話減持，若然係信佢分拆高追，又再中伏。中概股放風炒上割韭菜，都唔係今時今日嘅事，自願跟風高追做點心，都係無乜好埋怨。阿里都算係咁，由宣布重組到軟銀話再減持，都有成個星期時間畀人逃生，反觀京東(09618)呢頭話重組，消息公布一日已現完。京東最難睇係呢頭一公布，嗰頭就見劉強東減持，擺明係好消息出貨，都唔怕市場話佢內幕消息先出貨，真係自己唔尷尬，尷尬嘅就係人哋。

港股目前嘅情況係，久唔久就借消息挾一挾，但一直缺乏資金肯正正經經入場買貨坐定定，港股嚟嚟去去就借消息炒作，塘水滾塘魚，暫時恒指喺20000點上上落落，值博率有限，更何況金管局連番接港元沽盤，資金有出無入，試明靠乜嘢支持大市向上。呢啲市況，真係宜忍忍手，否則誤信消息衝動高追，隨時又做大戶點心。