古天后日誌｜港股失守250日線後市向淡居多

4月26日，大致多雲。早晚天氣較清涼，日間部份時間有陽光。美股隔晚下跌，主要係FRC公布業績後，其股價急跌50%收市，拖累大市氣氛，道指跌344點，標指跌65點，納指跌238點，跌幅接近2%。標指跌穿4100點，反映美股喺現水平已無法進一步向一突破。目前VIX仍處於20水平之下，一旦VIX進一步向上再穿25，美股可能出現更明顯向下。

FRC股價急跌五成，拖累美股氣氛，其他銀行股倍跌，單從FRC向聯儲局借入1012億美元嚟睇，其他銀行緊急借貸唔算多，因為聯儲局貼現窗加上BTFP共借出1439億美元計，即係大部份都係畀FRC借咗，其他銀行未見出現資金過渡短缺，只係暫時空軍定必針對FRC，短期將困擾市場及其他銀行股。

暫時3月嘅銀行危機已叫告一段落，銀行擠提情況亦未見再發生，只係銀行經此一役，已收緊信貸，將會衍生中小型企業難以籌集資金，或引發中小型企業破產。當FRC股價大跌嘅同時，10年美債息由3.64%回落至3.4%，更多人認為聯儲局需要提早減息救經濟，免美國經濟陷入衰退，5月加息0.25%嘅機率已回落至82%，即市場有18%嘅人預計5月係停止加息，更有超過三成人認為7月或開始提早減息。息口走勢係會影響股市表現，一旦5月停止減息，屆時美股又大條道理炒上。

至少收市後，兩大巨頭Google 跟微軟公布業績，兩者業績均好過預期，盤後股價分別升2%及8%，呢兩隻係古天后長線睇嘅股份，尤其係睇好AI概念嘅話，呢兩隻重磅科技股係必然之選。既然有美股更可信嘅AI概念股，又何必去無入所謂具AI概念嘅中概股呢?

港股呢邊表現係點，大家有眼睇，當較早前大市企於20000之上，古天后已表現大市若然無法突破20800阻力，結果只有再度向下，而20000樓上一直未見有資金入場買貨，實在唔明坊間竟會有人認為大市可以重返二萬二水平。一個缺乏成交支持嘅市場，何來上升動力?? 港股經過四個交易日向下，已重返20000水平之下，噚日更失守250日線，嚟緊即使有反彈，只要未能企返穩條250日線，基本上後市都難以睇好。