獨家丨鍾嘉欣拒做虎媽唔介意仔女入行結婚8年首公開夫妻長Keep熱戀秘訣

2023-05-22 07:00

去年初鍾嘉欣（Linda）大熱倒灶失落TVB視后，好彩有貼心脊醫老公Jeremy呵返，同年10月誕下孻女Anika，一家五口生活美滿。狀態大勇的鍾嘉欣最近由加拿大返港拍瘦面機廣告，Linda坦言心態已轉變，清楚知道家庭是人生最重要，每日瞓醒起身個腦只係諗老公同為頭家。作為幸福媽媽的Linda難得分享兩公婆相處的情趣：「我哋會保持拖手仔，佢會讚我靚，感激娶到我…」她確信健康的夫婦關係會直接影響下一代。採訪：方騫平

第3胎產後僅7個月就有工開，仲有得扮靚提升自信，Linda坦言好快樂。

Linda唔止身形fit到漏，仲愈嚟愈靚。

有「V煞」小顏面嘅鍾嘉欣回港拍瘦面機廣告。

留期期間不忘親子樂。

狀態大勇的鍾嘉欣帶埋3名子女及父母回港，第3胎產後僅7個月就開工，Linda形容好快樂：「除咗做完機效果好好，令到我好有自信外，最有趣係小朋友過埋嚟探班，佢哋終於知道媽媽係藝人會做啲乜，藉以身教，睇到媽媽認真嘅工作態度。」

鍾嘉欣最近回港拍瘦面機廣告，狀態大勇。

記者會上大派心心。

老公心目中「女神」

Linda唔止身形fit到漏，仲愈嚟愈靚，她堅持就算做咗人母，身心都要Keep住靚，要保持做面部提升及運動，食有營養食物，多飲湯水，另外要有正面思想，遠離負能量：「尤其人愈大，要清楚知道乜嘢係值得花時間，唔重要嘅事情就要放低。」問到是否老公心目中的「女神」？她笑說：「應該係啩，否則佢唔會娶我！」語畢Linda忍唔住放閃，再爆老公嘅甜言蜜語：「佢好多時話『老婆你好靚』，仲時不時會讚吓我『好幸運有你做我老婆』，不過結婚8年，大家都老夫老妻，老公唔會心心眼望住我，大家只會手牽手，希望健健康康一齊生活，好好培養3子女，等佢哋有一個安全地方成長。」

作為人母嘅Linda，穿上一件頭泳衣又白又滑。

39歲索人妻鍾嘉欣着泳衣在網上大派福利。

身形唔似3子女母親。

驚喜現身楊茜堯與羅子溢女兒「小珍珠」3歲生日P。

Linda留港期間，帶埋3子女同老友胡杏兒一家相聚。

和昔日「處女黨」成員李亞男，一齊帶埋小朋友去happy。

在港時去咗探可愛企鵝。

兩公婆要以禮相待

談及婚姻保鮮心得，Linda承認要經歷高高低低嘅難關，平平無奇會唔健康，她兩公婆都有拗撬，笑言拗撬係正常及健康嘅，要搵人挑戰思維，諗嘢才有進步：「我同老公絕對係共渡患難嘅夫妻，我哋經歷過好多嘢，所以感情都幾穩固。」她寄語所有夫妻，就算係兩公婆，記住對另一半有禮貌，唔好老奉，要唔該前唔該後，顧及對方感受：「我老公成日講笑，話佢嘅位置已去到好低，咁我都會呵返佢，要畀佢知道佢係排第一位，子女喺佢之後，咁先可以畀子女見到，父母有健康嘅夫妻關係，呢方面會直接影響到小朋友成長。」另外，夫妻間要保持拖手仔及每周有一日拍拖時間，要多啲交流及傾偈；而且記住一個人冇完美，就算發生乜事都唔可以放棄對方。

去年10月尾誕下孻女Anika，一家五口超幸福。

嘉欣在港時與父母及子女去staycataion，三代同堂好開心。

脊醫老公Jeremy視Linda為「女神」。

嘉欣承諾唔會放棄老公。

結婚8年，Linda婚後定居加拿大，兩公婆恩愛甜蜜。

Linda選擇在家分娩細仔Jared及孻女Anika，被讚非常勇敢。

去年返港參加台慶頒獎禮嘅Linda，可惜最終僅得「大馬視后」。

點都唔會放棄唱歌

育有兩女一子的Linda形容人生太美滿：「每日我會同小朋友講『我愛你』，盡量畀5至10分鐘單獨play time佢哋，唔會偏心，好彩因為有3個，佢哋學會share。」Linda唔做虎媽，平衡到休息及學習時間，她亦唔拒抗子女將來加入娛樂圈，會交畀個天安排，由佢哋自由發揮。𠵱家兩公婆親自照顧小朋友，所以需要長時間的工作，如返港拍劇，除非全家一齊飛返嚟，否則未必會拍：「只要一家人喺埋一齊就會舒服，最多兩周左右短暫嘅分離。」不過，Linda堅持唔會放棄唱歌：「唱歌係我一世都鍾意做嘅嘢，尤其作曲及填詞，我有14首創作，最近都有作品，有時間會推出。」