專欄｜英超歐協聯席位之爭有睇頭

英超煞科戰，雖然前6名順序塵埃落定，但唔係全無睇頭嘅。除咗有愛華頓、李斯特城同列斯聯嘅護級戰，同歐協聯附加賽席位有關嘅第7名之爭都非常激烈。

曾經踢過歐聯決賽嘅熱刺，若然嚟緊作客護級心切嘅列斯聯稍有差池，就可能自2008至2009球季之後，再次無緣歐洲賽。作為車路士球迷嘅艾爾，只可以同熱刺講：祝你好運！

暫時排第7位嘅阿士東維拉，近6場主場全勝兼只失1球，今次返到維拉公園球場，對住已經鎖定來屆歐霸盃分組賽席位嘅白禮頓，睇落贏面高啲。不過，由迪沙比執教下嘅白禮頓，艾爾好難講會Hea住踢，艾雲費格遜同祖利奧安斯素近期着晒火，呢場博入球大細[2.5]大同角球大細[10.5]大好過。

至於排第8位嘅賓福特，雖然射手艾雲東尼因為賭波案而被罰停賽，但球隊仲有麥比奧莫、尤尼韋沙等具速度嘅球員，無損入球效率同成績。蜜蜂兵團正正係今季殺低過曼城嘅其中一隊，睇埋藍月亮周中對白禮頓嘅表現，加埋有足總盃同歐聯決賽後顧，衡量過戰意後，艾爾覺得賓福特今次主場對曼城秤先少少，讓球受讓半一盤值博。艾爾

-----

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ