古天后日誌｜港股超賣下反彈 惟力度或相當有限

6月1日，美國仍等待國會就提高債務上限投票，美股表現偏軟，三大指數下跌，道指跌134點；標指跌25點；納指跌82點。一直擔心美股升勢過份集中，當領頭羊強勢股都要下跌，整體氣氛或隨時轉差。

3月美國待業職位(JOLTs)跌破千萬份至959萬，但4月意外地回升至1010萬份，遠超預估的937萬，其中大部份來自服務性行業，反映服務行業仍然擴張，但留意數字係4月份。但去到5月份，美國整體經濟開始急速下滑。5月芝加哥PMI由48.6跌至40.4，遠低於預期的47，反映美國製造業萎縮速度都幾快。數據一出，加上兩位美聯儲委員支持不加息，6月加息機率由66%大降至26%，喺核心PCE高企情況下，仍有52%嘅人認為7月會加息0.25%至5.25%，不過大部份人仍然預估至年底息率將回落至4.75%。

至於內地嘅經濟情況，似乎比美國更差，噚日內地經濟數據再一次差過市場預期，拖累中港兩地股市插水。由年初內地結束清零防疫政策後，需求一度極端反彈為首季經濟帶來短暫嘅高速增長勢頭。不過去到第二季已無以為繼。製造、建築、出口貿易、零售消費等市道嘅增長動力持續減緩，意味當局必須要推出更多財政及貨幣政策措施以穩增長。否則下半年經濟衰退與通縮風險壓力將更大，而當局化解內房危機及地方債務等內部隱患變得更加難搞。

內地經濟出現強預期，弱實現，主要係市場低估咗3年清零防疫對企業與消費所造成嘅創傷，令內部需求無法重返疫前水平。再者疫情期間資產投資「國進民退」嘅現象，加上科技業備受嚴厲監管打擊，致令民營經濟活力受損，至今未見復原。而由2018年爆發中美貿易戰至今，中美關係不斷惡化，大大影響外資在華投資，且歐美經濟面臨衰退風險，全球製造業不穩下，中國亦無可避免受到牽連。

喺目前內地咁嘅經濟狀況下，中港股市自然動彈不得，尋日嘅內地經濟數據，令中港兩地股市齊齊插水，不過人民幣似乎開始止跌，咁嘅情況下，累積咗一定跌幅嘅中港股市，有可能會短線反彈。只係仍然缺乏資金流入下，反彈力度唔好有太大期望，港股先睇能否回補噚日嘅下跌裂口18500，但18600-18700阻力唔嘢少，若然彈到呢個阻力再掉頭，港股隨時萬八關不保。