古天后日誌｜港股反彈成交未能配合慎防虛火

6月6日，大致多雲，有幾陣驟雨及狂風暴雨，稍後驟雨逐漸增加，部局地區雨勢頗大。隔晚係蘋果喺WWDC發布新產品，股價早段再破頂，其後產品公布股價回吐，拖累市場氣氛，三大指數下跌，但沽壓唔算嚴重。道指跌199點，標指跌8點，納指跌11點。

業績期過去，AI概念又炒咗一段時間，美債上限都通過埋，連蘋果發布新產品都炒完，可供炒作嘅消息，就只剩下6月份嘅聯儲局議息會議，加息與否嘅問題。美國經濟增長開始放緩，雖然就業數據強勁，但工資產長似停咗落嚟，但工業生產轉趨疲弱，新增訂單亦見明顯回落，目前美國經濟主要依靠服務業擴張作支撐，一但服務業亦由擴張變收縮，美國經濟或出現短暫衰退。

至於通脹未見再大幅向下，似乎目前係持平橫向發展，通脹高企下，即使暫停加息，亦難逆轉至減息，目前主流方向係6月份維持息口不變，7月或有一半機會再加息0.25%，9月息口未變，最快去到11月開始減息0.25%。不過呢啲都係市場預期，實際情況都係要取決於公布嘅經濟數據係點。再決定息口走勢。

美股呢一輪升勢主要由科技股帶動，因為市場憧憬減息，但美股累積升幅已唔少，向上空間已無之前咁多，更要慎防有獲利回吐盤隨時出現，尤其係本周再次拍賣國債，市場資金或被抽走，美股即使唔係轉勢，但都會有回吐壓力。之前都講過標指係4100有支持，如果標指再失4100，咁美股就好大機會轉勢。

美匯指數高見104.6後回落，105為關鍵大位，當美元轉強，金價亦從高位回落，不過目前金價仍然強勢，市場資金仍算充裕。美元轉強不利新興市場，按呢個理由，近日美元強勢，中港股市反彈其實有啲反常，只能解釋係中資力托挾淡倉，但要話係好堅實咁有資金喺低位買貨，就毫無說服力。呢幾日港股嘅反彈，完全唔見成交配合，噚日成交額連一千億亦欠奉，話有外資重臨，都只係自欺欺人。