古天后日誌｜港股淡靜暫無方向 現水平整固等議息

6月13日，部份時間有陽光，間中有幾陣驟雨，日間天氣酷熱。市場普遍預期6月今次議息會議唔會加息，美股繼續向上，道指升189點；標旨再升40點。升穿4300，仲有阻力4350同4400，4200成為標指重要支持；納指則升202點。

今晚美國將公布5月份CPI，市場估計同比增加4.1%，環比增加0.2%，由於去年基數偏高，預計未來兩個月CPI都會向下，但環比已連續三個月跌唔落，核心CPI都較為頑固。但美股對負面消息已無動於衷，數據公布都未必太過左右美股上落。

市場都預期6月唔加息，但7月預期加息0.25%，更有預測認為年底前可能減息一次，令息率回落至5%水平，問題係通脹仍然高企，加拿大及澳洲都意外加息，歐洲更掦言必會加息，因此美聯儲也承受頗大壓力，就算今次唔加息，都有機會放鷹。

美國商務部再添加31家中國企業，列入實體清單，中概股個別發展，電動車股表現較佳，電商股表現平平。港股喺19400呢啲阻力位前卻步，整體表現仍淡靜。雖然噚日午後A股叫有啲買盤入場，兩市成交增至9654億元，似乎有資金低吸A股，可惜力度有限，A股都係無乜力向上。至於港股交投仍然疲弱，成交只有802億元，見到唔開胃。升無人追，跌無人撈，19000水平嘅港股唔算貴，但都未見有大量資金入場買貨，個別板塊只係短炒，走遲半步贏變輸，咁嘅市況，試問邊個肯入場同你玩。