古天后日誌｜港股下半年關鍵需守18000

7月3日，短暫時間有陽光，間中有幾陣驟雨，天氣炎熱。美股上周五三大指數做好，半年結道指收市升285點；標指重返4400水平，升53點；納指則升196點。至少港股喺上半年高開低走，1月由22700水平跌至5月低位18000左右，6月反彈半年結收18916，半年跌865點，短線10日線19172及20日線19303將會有較大阻力，

雖然港股經過五窮月後，六月未算太絕，回升682點，不過7月份能否見到七翻身，暫時唔係太樂觀，由於6月份期指曾挑戰100日線，約19900未能企穩，暫時19900至20000阻力較大，而5月份低位18000為近日較大支持。望返個人民幣近日走勢轉弱，去年7.3算為低位，預期人民幣至呢個水平，內地會出手干預，中美息差擴大，或有助中方阻止人民幣持續貶值，呢一個可能係港股喺7月翻身嘅一個契機。

至於內地本月將召開政治局會議，故且睇睇有冇新政策扶持經濟。抗衡人民幣跌勢。不過相比去年，重視程度較低，主要係發改委、工信辦、國常委早已有新政策出台。以枝術走勢作分析，7月份嘅關鍵為18000水平，呢個位除咗係5月份低位，亦係恒指日線圖頭肩底嘅右肩，若然此關失守，港股將再下破今年低位。

港股面對嘅問題，除咗係魚缸缺水，無資金流入之外，本身經濟復甦步伐強差人意，任憑官員如何吹奏，事實擺在眼前，旅遊及消費市道未能回復疫情之前，股市和樓市景氣更每況愈下。內地跟本港經濟復甦未如預期，加上歐美明年面對多地選舉，政局動盪，不明朗因素增加之下，日子或更難捱。