古天后日誌｜港股持續弱勢 進一步向下尋底

7月7日，大致天晴，早上局部地區有稍雨，日間天氣酷熱。隔晚美國出小非農數據強勁，市場憂慮息率向上，打擊市場氣氛，美股低開後全面向下，收市前跌幅收窄；道指跌366點；標指跌35點；納指則跌112點。標指仍守4400大關，留意4350及4300為,短線支持，標指隔晚喺4385反彈重返4400，即係好友仍然頂得下。

自美國3月爆發銀行危機後，過去4個月有12個星期都係周初回調周末前挾升，標指守住4300，明顯係好友仍佔優勢，只係現水平先入場，向上博嘅空間已有限，不過幾隻龍頭重磅科技股仍頂住，美股暫未似出現大幅回調。技術走勢方面去睇，VIX一日唔升穿17，都好難威脅到好友。隔晚VIX升至此水平就回頭，美股繼續高位牛皮。

聯儲局口吻繼續放鷹，強調今年之內仍會加息兩次，至隔晚出咗小非農指數，7月加息機率已去到九成以上，而餘下時間再多加息一次，今年減息已無望。10年債息抽升至4.05%水平，但30年債息仍保持4%，再跟10年債息出現倒掛，反映10年債息或已接近見頂。

至於港股噚日跌至18500關鍵水平，喺反映中概股表現嘅金龍指數再跌3%之下，ADR及夜期進一步失守18400並考驗18300下一個支持。港股噚日急跌逾500點，主要係內房債及平台債危機再現，加上歐美債息上升，打擊市場氣氛，今日港股隨夜期及ADR下跌已無懸念。反正失守全部平均線後，古天后已肯定港股要展開新一輪跌浪，不過跌還跌，跌浪當中仍會有反彈，今日短線反彈阻力大約係18500，而18300為即市支持，下一個位為5月低位，大約係18200水平，相信18200應該點都守一守，但反彈至18500即使能上破18700阻力應該上唔返。港股弱勢已成，成交方面亦未見有資金肯入場，縱有短線反彈，亦不過係偶爾挾淡倉嘅行動，要等到何年何日港股方能翻身，外資是否重返係關鍵。