古天后日誌｜港股估值不高 偏偏欠資金流入 入市需有坐貨準備

7月11日，大致天晴，初時局部地區有驟雨，日間天氣酷熱。美股隔晩做好，市場唔等CPI公布已按奈不住，三大指數上升，道指升209點；標指升10點重上4400水平，納指則升24點。目前美股仍然高位整固，但上升動力減弱，主要係值博率已大減。市場最關注仍然係息率變化，明晚將公布CPI，估計有機會降至3.22%，但隨着基數回落，7月份數據或按年回升，似乎未有耐可以回至美聯儲局目標2%。美國CPI已連續幾個月橫行，並開始見反彈勢頭，市場偏向相信今個月議息再加息0.25%至5.25，預計息率將於高位徘徊一段時間。

話咁快美國又再踏入第二季業績公布期，打頭陣當然又係銀行股，3月份美國爆發地方銀行倒閉及擠提事件，資金從小型銀行流向大型銀行，唔排除大型銀行業績有唔錯表現，而近日有春江鴨開始買返銀行股，呢個亦係美股高居不下原因之一。不過一直支撐美股嘅重磅科技股，喺息率高企下，近日開始見回吐壓力。

中概股靠穩，人行公布向阿里罰款後，股價爆升，無奈喺港股呢邊補完個裂口即掉頭，雖然仍靠穩，但未能重返90元水平之上。港股噚日高開大走，升幅大大縮水，成交全日只有782億元，北水都短炒，噚日見高開又錄得淨流出，繼續彈出彈入。港股近日只有炒家出出入入，一直未見長線資金入場買貨，港股亦只有日升日跌，繼續炒上落。

雖然港股估值真係唔算高，偏偏係無資金肯流入買貨，炒極唔上，流動性弱，外資要沽嘅貨，都走得七七八八，問題係外資撤退後，港股回落至19,000水平之下，仍未見外資回歸，即使有心買貨嘅長線基金，似乎亦唔心急買貨，反正一街蟹貨，有心儲貨當然嘆慢板。近日港股就只有指數波幅較大，偶有挾淡倉就回升返一千幾百點，以為市況轉好追貨，最終又係得個桔，唔係話港股毫無投資價值，但閣下想買港股，就唔好望短期有大茶飯食，要有坐貨心理準備，至於坐貨要坐幾耐，古天后無水晶球，短則三兩個月，長則三兩年，尤其港股早已A股化，未來日子似乎都係有波幅，冇升幅居多，咁嘅情況，聰明資金唔流入港股都係好正常。